Барааны тэмдэг гэж юу вэ?
Та өөрийн бий болгосон оюуны хөрөнгөө яаж хамгаалдаг вэ? Энэ асуултад хариулж оюуны өмчийн нэг төрөл болох барааны тэмдгийн талаар товч мэдээлэл хүргэе.
Барааны тэмдэг гэж иргэн, хуулийн этгээд өөрийн бараа, үйлчилгээг бусад этгээдийн бараа, үйлчилгээнээс ялгах зорилгоор хэрэглэх ялгагдах чадвартай илэрхийллийг хэлнэ. Барааны тэмдэг нь үг, дүрс, үсэг, тоо, гурван хэмжээст дүрс, өнгө, дуу авиа, үнэр, эсхүл тэдгээрийг хосолсон байдлаар илэрхийлэгдэж болно.
Барааны тэмдэгт тавих ерөнхий шаардлага байх бөгөөд ялгагдах шинж чанар агуулаагүй дараах зүйлсийг барааны тэмдэгт тооцохгүй:
- Үсэг, тоо, геометрийн энгийн дүрс, нийтээр хэрэглэдэг тэмдэглэгээ, нэр томьёо дангаараа байвал,
- Тухайн бараа, үйлчилгээг тодорхойлсон нэр, барааны тоо, хэмжээ, жин, чанар, зориулалт, үнэ, үйлдвэрлэсэн газрын нэр, арга, хугацаа зэргийг тайлбарласан үг, дүрс,
- Тухайн бараа, түүний сав, баглаа боодлын үл ялгагдах хэлбэр, дүрс,
- Монгол Улсын түүх, соёлын дурсгалт зүйлийн нэр, дүрс дангаараа байвал,
- Монгол Улсын түүхэн хүмүүсийн бүтэн нэр, зохиомол нэр, хөрөг, зураг, тэдгээрт шууд хамаарах төсөөллийн нэр дангаараа байвал барааны тэмдгийн эрх үүсэхгүй.
Иймд танай худалдааны тэмдэг бусдаас ялгагдах онцлог шинж чанартайн дээр тухайн бараа, үйлчилгээг тайлбарлаагүй бол брэндийн өрсөлдөх чадвар буюу барааны тэмдгээр бүртгэгдэх магадлал улам нэмэгдэх юм.
Барааны тэмдэг, газар зүйн заалтын тухай хуульд заасан шаардлагын талаар зөвлөгөө мэдээлэл авахыг хүсвэл доорх хаягаар холбогдоно уу.
Нийтлэл бичсэн Х.Мэргэншагай
Оюуны өмчийн итгэмжлэгдсэн төлөөлөгч
Тусгай зөвшөөрлийн дугаар №120
МҮХАҮТ-ын Патент, барааны тэмдэг, газар зүйн заалтын газар
Утас: 77277070-8
Email: patenttmbur@mongolchamber.mn
