Монгол, Уругвайн худалдаа, эдийн засгийн хамтын ажиллагааны талаар санал солилцлоо

МҮХАҮТ-ын Гадаад харилцаа, хамтын ажиллагааны газрын дарга Б.Жаргалсүрэн Бээжин дэх Дорнын Бүгд Найрамдах Уругвай Улсын Элчин сайдын яамны Элчин зөвлөх Мартин Орландо, Батлан хамгаалахын атташе Марселино Капотте нарыг өчигдөр /2024.12.11/ хүлээн авч уулзлаа. 

Тус улсын шинээр сонгогдсон Ерөнхийлөгч Яманду Орсигийн тэргүүлэх Засгийн газар 2025 оны гуравдугаар сарын 1-нээс үүрэгт ажилдаа орох бөгөөд үүнтэй холбогдуулан Монгол, Уругвайн худалдаа, эдийн засгийн хамтын ажиллагааны хүрээнд хийх ажил, арга хэмжээний талаар дэлгэрэнгүй санал солилцлоо. 

Хоёр талын хамтын ажиллагааг идэвхжүүлэх зорилгоор хамтарсан арга хэмжээг зохион байгуулах боломжуудын талаар санал солилцож, боломжит салбаруудыг, тэр дундаа хөдөө аж ахуй, сэргээгдэх эрчим хүчний салбарыг онцоллоо. Зарим тоо баримтаас дурдахад, Уругвай улс нь нь 3 сая гаруй хүн амтай, хөдөө аж ахуйн салбар, экспортод тулгуурласан эдийн засгийг хөгжүүлсэн Өмнөд Америк тивийн улс бөгөөд тус улсын голлох экспорт нь үхрийн мах, хүнсний ногоо, бяслаг, цөцгийн тос зэрэг сүүн бүтээгдэхүүн, химийн бүтээгдэхүүн, цагаан будаа юм. Түүнчлэн, хоёр улсын иргэд 30 хүртэл хоног харилцан визгүй зорчих нөхцөлтэй.