“WOMEN OWNED” тэмдэгтэй бизнес эрхлэгчдийн бараа бүтээгдэхүүнийг "И март" сүлжээ дэлгүүрүүд ОНЦОЛНО
МҮХАҮТ "Голомт" банктай хамтран бизнес эрхлэгч эмэгтэйчүүдийг чадавхжуулах, бүтээмжийг дээшлүүлэх, уул уурхайн бус экспортыг нэмэгдүүлэх, тогтвортой санхүүжилтыг дэмжих, тэдэнд тулгарч байгаа зах зээлийн саад бэрхшээлийг арилгах, бүтээгдэхүүн, үйлчилгээний ялгарлыг бий болгох, эмэгтэй удирдлагатай бизнесийг олон нийтэд таниулан сурталчлах зорилгоор “WOMEN OWNED” тохирлын тэмдгийг санаачлан, хэрэгжүүлж байгаа билээ.
Тэгвэл энэ хүрээнд “Голомт” банк, МҮХАҮТ, “Скайхайпермаркет” буюу “И март” сүлжээ дэлгүүр хамтран ажиллах санамж бичиг байгууллаа. Санамж бичгийг МҮХАҮТ-ын Гүйцэтгэх захирлын түр орлон гүйцэтгэгч Ц.Магнайбаатар, “Голомт” Банк ХК-ийн Байгууллага хөгжлийн газрын захирал Ц.Байгалмаа, “Скайхайпермаркет” ХХК-ийн ТУЗ-ийн гишүүн Б.Бадамханд нар үзэглэлээ.
Энэхүү санамж бичиг нь бизнес эрхлэгч эмэгтэйчүүд, “Women Owned” тохирлын тэмдэг хэрэглэгч байгууллагуудыг дэмжих хүрээнд хамтран ажиллаж, чадавхжуулах, эдийн засгийн олон талт өсөлтийг дэмжих зорилготой юм.
Тодруулбал, “И март” дэлгүүрүүдээр “Woman owned” тохирлын тэмдгийг эзэмшиж байгаа эмэгтэй бизнес эрхлэгчдийн үйлдвэрлэж буй бараа бүтээгдэхүүнийг ялгарлыг нь бий болгох, тохирлын тэмдэг гэсэн тусгай хаяг, шошго бүхий лангуу бий болгох, янз бүрийн эвентүүд, хөнгөлөлттэй худалдаа зохион байгуулах гэх мэт байдлаар хамтарч ажиллах юм.
“Women Owned” тохирлын тэмдгийг одоогоор 50 гаруй ААН аваад байна.
