МҮХАҮТ “Шинжлэх ухааны паркийн захиргаа”-тай хамтарч ажиллана
Монгол Улсад өндөр технологийн үйлдвэрлэл хөгжүүлэх, экспортын орлогыг нэмэгдүүлэх, үндэсний үйлдвэрлэлийг хөгжүүлэхэд шинжлэх ухаан, технологид суурилсан гарааны бизнесийг дэмжих экосистемийг бүрдүүлэх нь нэн чухал асуудал болоод байна.
Энэ хүрээнд “Шинжлэх ухааны паркийн захиргаа” шинжлэх ухаан, технологи, үйлдвэрлэлийн нэгдэл нь БНСУ-ын Шинжлэх ухаан технологийн хүрээлэн KAIST болон Солонгосын Дэежон хотын "Бүтээлч эдийн засаг, инновацийн төв"-тэй хамтран "Шинжлэх ухаан технологийн гарааны бизнесийн экосистемийг бэхжүүлэх” ODA төсөл хэрэгжүүлж байна.
Төслийн хүрээнд Монгол Улсад шинжлэх ухаан, технологид суурилсан гарааны бизнесийн экосистемийг хөгжүүлэхэд МҮХАҮТ-ын гишүүн байгууллагууд ямар байдлаар оролцож, хамтарч ажиллах боломжтой талаар уулзалт хийлээ.
Уулзалтад МҮХАҮТ-ын Дэд захирал Ц.Магнайбаатар, Гишүүнчлэлийн газрын дарга М.Очирбат, Патент, барааны тэмдэг, газарзүйн заалтын газрын дарга С.Дүүрэнжаргал нар оролцов. Нөгөө талаас Монгол Улсын Шинжлэх ухааны паркийн захиргааны гүйцэтгэх захирал Б.Амарсанаа, Технологи дамжуулах албаны дарга С.Гэрэлт-Ирээдүй, БНСУ-ын Даежон хотын “Бүтээлч эдийн засаг, инновацийн төв”-ийн ерөнхий менежер Hwang, Youn-Sung, БНСУ-ын Даежон хотын “Бүтээлч эдийн засаг, инновацийн төв”-ийн Part Leader Kim, Young-Jae, “Hanbat” Их Сургуулийн професор Junseok Seo нар уулзав.
Уулзалтын эхэнд МҮХАҮТ-ын үйл ажиллагаа, хэрэгжүүлж буй төслүүд, бодлогын өмгөөлөл, гарааны бизнес, мэдээлэл технологийн чиглэлээрх компаниудын өнөөгийн байдал, дэмжин ажиллаж байгаа төсөл, арга хэмжээний талаарх танилцуулга хийв.
Улмаар бизнес эрхлэгчид, ААН-үүдийн технологи хөгжүүлэлт, нэвтрүүлэлт хийх хэрэгцээ шаардлага, гарааны бизнесийг дэмжих бодлого, хууль эрх зүйн орчин болон мэдээлэл технологийн салбарын өнөөгийн байдлын тухай санал солилцож, цаашид уг төслийн хүрээнд хамтран ажиллахаа илэрхийллээ.
