"MOCK TRIAL 2024" Арбитрын мэтгэлцээний тэмцээнд "Отгонтэнгэр" их сургуулийн оюутнууд түрүүллээ
"MOCK TRIAL 2024" Арбитрын мэтгэлцээний тэмцээн өчигдөр /2024.12.03/ МҮХАҮТ-д амжилттай боллоо.
Энэхүү тэмцээнийг Монголын Үндэсний Худалдаа Аж Үйлдвэрийн Танхимын дэргэдэх Монголын Олон Улсын Арбитраас зохион байгуулсан бөгөөд хууль зүйн их, дээд сургуулийн бакалаврын түвшний үндсэн ангийн сургалтад хамрагдаж байгаа оюутнууд хамрагдаж, оролцсон юм.
“Mock trial-2024” арбитрын мэтгэлцээний тэмцээн нь хэрэг, маргаан дээр хэргийн оролцогчийн байр сууринаас оролцох, маргааныг шүүхийн бус журмаар хянан шийдвэрлэх практик судалгааг өргөжүүлэх, хөгжүүлэх, эрх зүйн боловсролын хөгжлийг дэмжих ач холбогдолтой юм.
Тэмцээнд нийт зургаан сургуулийн найман баг 12 тоглолт хийж оролцсон бөгөөд шүүгчээр арбитрч Б.Баатар, Д.Уянга, Т.Сэргэлэн, Б.Пүрэвням, А.Алтанзул нар ажиллалаа. Тэмцээний арбитрын бүрэлдэхүүн шийдвэр гаргахдаа дараах шаардлагуудыг үндэслэж, багуудад оноо өгсөн юм.
1. Тайлбарлаж буй үйл баримтын үндэслэл;
2. Хууль хэрэглээ, онолын мэдлэг;
3. Асуулт тавьж буй байдал;
4. Асуултад хариулт өгч буй байдал;
5. Няцаах тайлбар гаргаж буй байдал;
6. Нотлох баримтыг үнэлж, ашиглаж буй байдал;
7. Илтгэгчийн ур чадвар;
8. Багаар ажиллах чадвар;
9. Цагийг үр дүнтэй ашигласан эсэх;
10. Мэтгэлцээний соёл;
11. Хуульчийн бичиг баримт боловсруулах ур чадвар
Ингээд тэмцээний:
1-р байр: "Отгонтэнгэр" их сургууль
2-р байр: "Санхүү эдийн засгийн их сургууль" /1-р баг/
3-р байр: "Санхүү эдийн засгийн сургууль" /2-р баг/ тус тус шалгарлаа.
Шилдэг илтгэгчээр "Отгонтэнгэр" их сургуулийн 4а ангийн оюутан Л.Жавхлант шалгарсан юм.
