Монголоос Япон руу экспортлох бараа бүтээгдэхүүнд олгох гарал үүслийн гэрчилгээг цахимаар олгоно
Эдийн засгийн түншлэлийн тухай Монгол Улс, Япон улс хоорондын хэлэлцээр 2016 онд хүчин төгөлдөр болж, 2016 оны 06-р сарын 07-ны өдрөөс хэрэгжиж эхэлсэн.
Хэлэлцээрийн зорилго нь хоёр улс хоорондын худалдаа, хөрөнгө оруулалт, аж үйлдвэрийн салбарын нэмүү өртөг шингээсэн экспорт, валютын орлого зэргийг нэмэгдүүлэх, японы тарифын болон тарифын бус саад тотгорыг багасгах, худалдааг хөнгөвчлөх, гаалийн бүрдүүлэлтийг хялбаршуулахад оршино.
Хэлэлцээрийн хүрээнд Монголын тал 97 бүлгийн 5700 орчим төрлийн бараа, Японы тал 97 бүлгийн 9300 орчим төрлийн барааны импортын гаалийн тарифыг бууруулахаар хэлэлцээ хийсэн ба манай улс эдгээр импортын барааны гаалийн тарифын 59 хувийг (3429 төрлийн бараа), харин Япон улс 86 хувийг (8000 төрлийн бараа) хэлэлцээр хүчин төгөлдөр болсон өдрөөс эхлэн тус шууд чөлөөлсөн.
Энэхүү хэлэлцээрийн хүрээнд Монгол Улсаас Япон улс руу экспортолж буй бараа бүтээгдэхүүнд олгох гарал үүслийн гэрчилгээг цахимжуулах зорилгоор Монголын үндэсний худалдаа аж үйлдвэрийн танхимаас Япон талын ирүүлсэн саналын дагуу тус гэрчилгээг 2025 оны 05 дугаар сарын 07-ны өдрөөс “PDF” форматаар экспортлогчдод олгож эхлэх болсныг үүгээр мэдэгдэж байна.
МҮХАҮТ-ын Хэрэглэгч үйлчилгээний газар
