Бизнес академийн захирал Д.Асралт "Албан бус эдийн засаг, албан бус хөдөлмөр эрхлэлт" сэдэвт форумд оролцож байна
Олон Улсын Хөдөлмөрийн Байгууллагын Ази, Номхон далайн бүсийн товчоо "Албан бус эдийн засаг, албан бус хөдөлмөр эрхлэлт" сэдвээр мэдлэг, туршлага хуваалцах бүсийн форумыг Тайланд улсын Бангкок хотод 2024 оны 11-р сарын 26-28-ны өдрүүдэд зохион байгуулж байна.
Уулзалтаар албан бусаас албан эдийн засагт шилжих шинэлэг арга барил, албажуулах сайн туршлагын талаар Ази, Номхон далайн бүсийн орнуудын Засгийн газар, үйлдвэрчний эвлэл, ажил олгогчдын төлөөлөл харилцан мэдээлэл, туршлагаа солилцох юм.
Форумд Гэр бүл, хөдөлмөр, нийгмийн хамгааллын Нэгдсэн бодлого төлөвлөлтийн газрын ахлах шинжээч Ш.Маяа, Монголын Үйлдвэрчний эвлэлийн холбооны Хөдөлмөр, нийгмийн хамгааллын бодлогын газрын дарга М.Нямдаваа, Монголын Үндэсний Худалдаа аж үйлдвэрийн танхимын Бизнесийн академийн захирал Д.Асралт нар оролцож байна.
МҮХАҮТ-ын Бизнес Академийн хувьд бизнес эрхлэлтийг дэмжих, улмаар албан бус хөдөлмөр эрхлэлтийг бууруулах боломж болон бизнесийн боловсролыг дэмжих зорилготой Pmba хөтөлбөрийн онцлог, хамрагдалт, үйл явцын талаар Ази номхон далайн орнуудын төлөөлөгч нарт танилцуулж, туршлага солилцож байна.
