“БРЕНДИНГ ба ДИЖИТАЛ МАРКЕТИНГ” сургалтыг Их Британи Улсаас Монгол Улсад суух Элчин сайд Фиона Блайт нээж, бизнес эрхлэгчдэд амжилт хүслээ

Олон улсын худалдааны төвөөс зохион байгуулж буй “БРЕНДИНГ ба ДИЖИТАЛ МАРКЕТИНГ” сэдэвт бизнес эрхлэгчдэд зориулсан сургалт өнөөдөр /2024.11.20/ МҮХАҮТ-ын 503 тоотод эхэллээ.

Сургалтын нээлтэд  Их Британи Улсаас Монгол Улсад суух Онц бөгөөд Бүрэн эрхт Элчин сайд Фиона Блайт хүрэлцэн ирж, оролцогчдод хандаж үг хэлэн, амжилт хүслээ. Тэрбээр “Монгол Улсын эдийн засгийн өсөлтөд нөлөөлж байгаа залуу эмэгтэй төлөөлөгчид болон бизнес эрхлэгчид та бүхэнд энэхүү сургалтад хамрагдаж байгаад чин сэтгэлээсээ талархаж байна. Бизнес эрхлэгч эмэгтэйчүүдийг чадавхжуулна гэдэг бол зөвхөн бизнесийг чадавхжуулах бус хувь хүмүүсийг дэмжих, цаашлаад гэр бүл, олон нийт, Монголын эдийн засгийг бэхжүүлэхэд чухал үүрэг гүйцэтгэдэг тул маш чухал юм. Энэ хоёр өдрийн турш та бүхэн хурдацтай хөгжиж байгаа өнөө цагийн цахим, дижитал ертөнцөд шинэ стратегиудыг хөгжүүлэх замаар өөрийнхөө бизнесийг хөгжүүлэх талаар мэдээлэл олж авах болно. Та бүхэнд амжилт хүсье” хэмээлээ.

Мөн МҮХАҮТ-ын Гүйцэтгэх захирал Т.Дүүрэн “МҮХАҮТ-ын зүгээс бизнесийн байгууллагууд дотор маш олон төрлийн үйл ажиллагааг хэрэгжүүлж ажилладаг. Сүүлийн жилүүдэд бизнес эрхлэгч эмэгтэйчүүдийн чиглэлд илүү анхаарч ажиллаж байна. Тэдэнд тулгардаг бэрхшээлүүдийг хамгийн сайн ойлгож, асуудлуудыг шийдэх олон төрлийн санал санаачлагууд хэрэгжүүлэн ажиллаж байна. “She trades Mongolia hub” байгуулагдсан цагаасаа эхлэн 1000 орчим бизнес эрхлэгч эмэгтэйчүүдэд хүрч ажилласан байна. Бидний хэрэгжүүлж байгаа нетворкинг арга хэмжээ зөвхөн эмэгтэйчүүдээ дэмжих, бизнесийг өргөжүүлэхээс гадна хамтдаа саналуудаа хуваалцдаг, хамтын ажиллагаагаа өргөжүүлдэг, хамтдаа цаашид дэвших боломжуудыг олгодог юм. Та бүхэн хоёр өдрийн сургалтаас их зүйл сурахыг хүсье” гэлээ.

Хоёр өдөр үргэлжлэх энэхүү сургалтаар брэндинг, дижитал маркетинг, хиймэл оюун ухааныг хэрхэн үр өгөөжтэйгээр ашиглах, анхаарал татахуйц видео болон бичгэн маркетинг хэрхэн бий болгох талаар мэдлэг мэдээллийг олж авах юм.

Мөн энэхүү сургалтад хамрагдсанаар Олон Улсын худалдааны төвийн гарын авлага, “SheTrades Mongolia Hub”-ын гишүүн болж хамтын ажиллагаа нетворкио өргөжүүлэх, Олон Улсын Худалдааны төвөөс сургалтад амжилттай хамрагдсан сертификат авах боломжтой юм.