ААН-үүд Азийн хөгжлийн банк, Дэлхийн банкнаас хэрхэн санхүүжилт авах, бизнесийн боломжоо нээх талаар сонсож, туршлага судаллаа

МҮХАҮТ, Азийн хөгжлийн банк, Дэлхийн банкнаас хамтран “Бизнесийн боломж уулзалт-семинар”-ыг амжилттай зохион байгууллаа. Энэхүү семинар-уулзалтад 100 гаруй аж ахуй нэгжийн төлөөлөл оролцож,  

1. АХБ, ДБ-ны Монгол Улсад хэрэгжүүлж буй төсөл, хөтөлбөрүүдтэй танилцаж,

2. АХБ, ДБ-ны санхүүжилт бүхий төслийн тендер шалгаруулалтад оролцох талаар мэдээлэл авч,

3. Гэрээ байгуулж хэрэгжүүлэх туршлага судалж,

4.“Ганцаарчилсан” уулзалтууд буюу АХБ болон ДБ-ны Худалдан авах ажиллагаа хариуцсан мэргэжилтэнгүүдтэй тусгайлан уулзаж, тодорхой асуултанд хариулт авлаа.

“Бизнесийн боломж уулзалт-семинар”-ын нээж, МҮХАҮТ-ын ГХХАГ-ын дарга Б.Жаргалсүрэн үг хэлэхдээ өнгөрсөн 30 жилийн хугацаанд Дэлхийн Банк нь Монгол ​​Улсад 1.4 тэрбум гаруй ам.долларын хөгжлийн санхүүжилт, АХБ-наас Монгол Улсад эдийн засаг, нийгмийн салбарт 371 зээл, буцалтгүй тусламж, техникийн тусламж, нийт 4.1 тэрбум ам. долларын санхүүжилт олгосон байгаа талаар онцоллоо.  

Улмаар энэхүү арга хэмжээ нь Монгол Улсын бизнес эрхлэгчид, ADB болон WB-ийн санхүүжүүлсэн төслүүдийн хоорондын харилцааг шинэ түвшинд хүргэх зорилготой бөгөөд бизнесийн оролцоог нэмэгдүүлэх, оролцогчдод олон улсын зах зээлд нэвтрэх гарцыг нээж өгөх, худалдан авалтын үйл явцыг тодорхой болгох, мөн байгууллагууд хоорондын харилцаа, ойлголтыг гүнзгийрүүлэх чухал алхам юм гэдгийг цохон тэмдэглэлээ.

Мөн Азийн хөгжлийн банкны Монгол Улсыг хариуцсан Захирал Шаннон Кристин Каулин хэлэхдээ “Бид хүртээмжтэй байдлыг сайжруулах, жендерийн эрх тэгш байдлыг хангах, чадавхыг бэхжүүлэх, мэдлэгийг хүртээх чиглэлээр гишүүн орнууддаа дэмжлэг үзүүлж ажиллаж байна. Мөн Азийн хөгжлийн банкны бизнесийн гол зарчмуудыг баримталж, Монгол Улсын ард түмэнд төслөөсөө үр өгөөж өгөх чиглэлээр ажиллаж байна. Монгол Улсын Засгийн газарт зээл санхүүжилт олгоод, олгосон зээлийн хүрээнд төсвийг бодит амьдрал дээр хэрэгжүүлэхэд хувийн хэвшил маш чухал оролцоотой ажилладаг. Монгол Улс тэсвэртэй байдлаа сайжруулахын тулд зөвхөн санхүүгийн дэмжлэг авахаас гадна мэдлэгийн цөмийг бий болгох шаардлагатай” хэмээсэн юм.

Дэлхийн банкны Монгол Улс дахь Суурин төлөөлөгчийн үүрэг гүйцэтгэгч Хосе Луи Диаз Санчес мөн “Дэлхийн банк шударга, ил тод байдлыг урт хугацааны нөлөө болгохыг мөрдөж ажилладаг. Зөвхөн хамгийн бага дүнтэй тендерийг сонгохоосоо илүүтэй үнэ цэнийг нь харж төслүүдээ сонгодог. Бид дэд бүтцийн төслүүд, үүний дотор эрчим хүч, зам тээвэр, хот байгуулалтын төслүүдтэй хамтарч ажилладаг.  Энэ семинарын хүрээнд эдгээр төслүүдийн боломжийн талаар хуваалцаж, мэдээлэл хүргэнэ. Ингэснээр та бүхэнд өрсөлдөөнт сонгон шалгаруулалтад оролцоход дэмжлэг болно. Дотоодын бизнесийн байгуулагуудад боломжийн талаар илүү мэдээлэл өгч, ярилцахыг хүсэж байна. Эцэст нь инновацилаг, шинэ туршлага, мэдлэгт тулгуурлаад ирээдүйг цогцлоох, эдийн засгийн өсөлтийг бий болгох, тогтвортой нөлөөллийг Монгол Улсад үлдээхэд та бүхний оролцоо чухал ач холбогдолтой” гэдгийг онцлон тэмдэглэлээ.

Ингээд Азийн хөгжлийн банкны Монгол дахь үйл ажиллагаа хариуцсан албаны дарга Чандра Мохан Арора Монголд хэрэгжиж буй Азийн хөгжлийн банкны санхүүжилттэй төслүүдийн талаар, Азийн хөгжлийн банкны Монгол дахь үйл ажиллагаа, Монголд хэрэгжиж буй төсөл хөтөлбөрийн багцын тойм, гишүүн орнуудтай хамтран ажиллах стратеги, зээл, буцалтгүй тусламжийн төсөл, хөтөлбөрийн гүйцэтгэл, ямар боломжууд, сорилт бэрхшээлүүд тулгарч буй талаар, үр ашиг, хэрэгжүүлэгч байгууллагын чадавхийг бэхжүүлэх зэрэг асуудлуудаар багцлан мэдээлэл, илтгэл хүргэлээ.

Үүний дараа Монгол Улс дахь дэлхийн банкны хэрэгжүүлж буй хөтөлбөр, санхүүжилт бүхий төслүүд, тендерт оролцогчид юуг мэдэх шаардлагатай вэ, санхүүжилт бүхий төслийн боломжуудыг хэрхэн олох, төслийн тендер шалгаруулалтад амжилттай оролцож, гэрээ байгуулж, хэрэгжүүлсэн туршлагаасаа хуваалцсан илтгэлүүд тавьсан юм. Дараа нь аж ахуйн нэгжийн төлөөллүүд Азийн хөгжлийн банк болон Дэлхийн банкны төлөөллүүдтэй ганцаарчилсан уулзалтууд хийж, төслөө танилцуулсан юм.