ТАНИЛЦ: 2023 ОНЫ ТОП 100, ТЭДЭНТЭЙ ӨРСӨЛДӨХҮЙЦ 150 АЖ АХУЙН НЭГЖ
Монгол Улсын Засгийн газар, Монголын Үндэсний Худалдаа Аж Үйлдвэрийн Танхим жил бүр хамтран “ТОП-100” ААН-ийг эрэмбэлэн, алдаршуулдаг хүндэтгэлийн үйл ажиллагааг 23 дахь жилдээ зохион байгууллаа. Энэ жилийн хувьд ТОП 100-гаас гадна тэдэнтэй өрсөлдөх 150, нийт 250 компанийг эрэмбэлсэн юм. Компанудын мэдээллийг та бүхэн энэхүү линкээр орж харах боломжтой.
https://online.fliphtml5.com/tziup/dyxa/#p=1
Монгол Улсын эдийн засаг, нийгмийн хөгжилд хувийн хэвшлийн ТОП 100 аж ахуйн нэгжүүдийн оруулж буй хувь нэмэр 2023 онд өссөн үр дүнтэй байна. ТОП 100 ААН-ийн борлуулалтын орлогын хэмжээ өмнөх оноос 11.4 их наяд төгрөгөөр өсөж 50.4 их наяд хүрсэн нь ДНБ-ий 73 хувьтай дүйж, төлсөн татварын хэмжээ 6.3 их наяд төгрөгт хүрсэн нь татварын нийт орлогын 29 хувь болж байгаа бөгөөд эдгээрт ажиллагсдын тоо 83.7 мянга буюу нийт ажлын байрны 7 хувийг эзэлж байгаа нь өмнөх оноос 1 хувиар өссөн байна.
ТОП 100 аж ахуй нэгжийн 89 нь хязгаарлагдмал хариуцлагатай компани, 14 нь хувьцаат компани байна. Салбараар нь авч үзэхэд уул уурхай олборлолтын салбар тэргүүлж, худалдаа, банк санхүү, боловсруулах үйлдвэрлэл, барилгын салбарууд удаалжээ. Мөн экспортын үйл ажиллагаа явуулдаг 27 аж ахуйн нэгж, түүний дотор уул уурхайн бус бүтээгдэхүүн экспортолдог долоон аж ахуйн нэгж энэхүү жагсаалтад багтжээ.
Энэ удаа ТОП 100 ААН-ийг өргөмжлөхийн зэрэгцээ тэдгээртэй өрсөлдөх 150 компанийг эрэмбэлэн танилцуулж байгаагаараа онцлогтой юм. Эдгээр 250 ААН-ийн борлуулалтын орлогын дүн ДНБ-ий 93 хувьтай тэнцэж байгаа ба төлсөн татвар нь нийт татварын орлогын 34 хувийг бүрдүүлсэн байна. Ирэх жилээс ТОП 500 ААН-ийн жагсаалтыг гаргах бөгөөд энэ нь бизнес эрхлэлтийн түвшнийг илэрхийлэх шинэ үзүүлэлт болохоос гадна жижиг, дунд бизнесийг идэвхижүүлэх, тэдгээрийг нийтэд таниулж хөрөнгө оруулалт, борлуулалтын үйл ажиллагаанд нь дэмжлэг болох зорилготой юм.
