Нүүрстөрөгчийн ялгарлыг бууруулах стратеги боловсруулах сургалтад аж ахуй нэгжүүд хамрагдлаа
МҮХАҮТ-ын хурлын танхимд өнөөдөр /2024.11.14/ нүүрстөрөгчийн ялгарлыг бууруулах стратеги боловсруулах сургалт болж байна. Сургалтад "Таванбогд", "ХААН" банк, "Доктор авто чэйн", "Уудам говийн гэрэл", "Монгол базальт" гэх мэт 30 гаруй компанийн төлөөлөл оролцлоо.
Сургалтыг стратегийн зардлын удирдлага, тогтвортой эх үүсвэр бий болгох, нийлүүлэлтийн сүлжээний нүүрстөрөгчийн ялгарлыг бууруулах, нөөцийн эргэлт, үйлдвэрийн зохион байгуулалт/чадавхыг нэмэгдүүлэх, M&A хамтын ажиллагаа зэрэг чиглэлээр мэргэшсэн Энэтхэг улсын “GEP Chennai”-н захирал, Рагу Экамбарам удирдан явуулсан юм.
Энэхүү сургалтад компаниудад санал болгодог нүүрстөрөгчийн менежментийн ерөнхий үйл явцыг тусгасан бөгөөд GEP-ээс олон компаниудад үр дүнтэй хэрэгжүүлсэн 10 шаттай үйл явц юм.
Сургалтыг Үнэлгээ, Хэсэгчлэл, Стратеги боловсруулалт, Зорилтын тодорхойлолт, Хэрэгжүүлэлт гэх таван модулийг өргөн хүрээнд хамруулж, интерактив хэлбэрээр явуулсан бөгөөд сургагч багш эхлээд ойлголтуудыг танилцуулсны дараагаар оролцогчдод ойлголтуудыг эзэмшиж ойлгоход туслах жижиг дасгал ажлууд хийж, дадлага хийлгэв.
