МҮХАҮТ Урчуудын эвлэлээс баталсан загвар, зохиогчийн эрхээр хамгаалсан бэлэг дурсгал, сувенирыг “Дэлхийн Экспо 2025” Осакад ашиглана
Монголын Үндэсний Худалдаа Аж Үйлдвэрийн Танхим, Монголын оюуны өмч хамгаалах холбоо ГҮТББ хамтран “Зохиогчийн эрх ба цахим орчны хамгаалалт” сэдэвт хэлэлцүүлгийг өнөөдөр зохион байгууллаа.
Монгол Үндэсний Худалдаа Аж Үйлдвэрийн Танхим нь Оюуны өмчийн тухай хуулийн 10 дугаар зүйлд заасан Оюуны өмчийн үндэсний зөвлөлийн гишүүн байгууллага бөгөөд энэхүү хуульд заасан чиг үүргийн дагуу оюуны өмчийн эдийн засгийн эргэлтийг дэмжих бодлого боловсруулагч институци хоорондын уялдааг хангах, хувийн хэвшлийн нэгдсэн дуу хоолойг шийдвэр гаргагчид болон олон нийтэд хүргэх зорилгоор энэхүү хэлэлцүүлгийг зохион байгуулж буй юм.
Хэлэлцүүлэгт Монгол Улсын эдийн засгийг бүрдүүлж буй соёлын салбар, тэр дундаа видео контент, кино урлаг, дуу хөгжмийн салбарын оролцогч талуудын зохиогчийн эрхийн хамгаалалтын өнөөгийн байдал болон оюуны өмчийн цахим зөрчлийг илрүүлэх системийг боловсронгуй болгох, цахим зөрчлийг хялбаршуулсан журмаар илрүүлж, шийдвэрлэх эрх зүйн орчныг бүрдүүлэх хэрэгцээ, шаардлагын талаар хэлэлцлээ.
Энэ үеэр Монголын Урчуудын Эвлэл болон “Өв Бэлэг Дурсгал Сувенир” ХХК хооронд хамтын ажиллагааны санамж бичиг байгууллаа. “Өв Бэлэг Дурсгал Сувенир” ХХК нь зөвхөн Монголын Урчуудын эвлэлээс баталсан албан ёсны лицензтэй бэлэг дурсгал, сувенирыг худалдан борлуулна. Ингэхдээ уг бүтээгдэхүүний борлуулалтаас, эх загварыг нь бүтээсэн мэргэжлийн уран бүтээлчид роялти төлөх буюу оюуны бүтээлийг эдийн засгийн эргэлтэд оруулах зарчмаар ажиллах юм.
Мөн МҮХАҮТ нь ӨБДС ХХК-ийн оюуны өмчөөр баталгаажсан бүтээгдэхүүнийг Монгол улсыг төлөөлөн оролцдог бүх олон улсын үзэсгэлэн, түүн дотор Дэлхийн Экспо 2025 Осака (2025 оны 4-10 сар) зэрэг арга хэмжээ болон гадаад харилцаандаа ашиглаж байх талаар Санамж Бичиг байгууллаа. Энэ нь соёлын экспорт, аялал жуулчлалын сурталчилгаа, үндэстний бахархалт үзлийг түгээх зэрэг олон чиглэлт санаачилга бөгөөд монгол хүн оюуны бүтээлээрээ тогтмол орлого олох боломжийг нээж өгч байгаа юм.
