"Эрдэнэт үйлдвэр" ТӨҮГ-ын ажилчид "Ханбогд", "МАК", "МСS кока кола" ХХК-иудын үйлдвэртэй танилцлаа
МҮХАҮТ-ын гишүүн байгууллага болох "Эрдэнэт үйлдвэр" ТӨҮГ-ын Төлөвлөлт, эдийн засгийн шинжилгээний хэлтсийн найман хүний бүрэлдэхүүн баг 2024.11.07,08-ны өдрүүдэд МҮХАҮТ-ын гишүүн байгууллагууд болох "Ханбогд" ХХК, "МАК" ХХК, "МСS кока кола" ХХК-ийн үйлдвэрүүдтэй танилцах аялал хийлээ.
Энэхүү танилцах болон ажил хэргийн уулзалтыг МҮХАҮТ-ын Гишүүнчлэлийн газраас зохион байгуулсан юм.
1. "Ханбогд Кашимер" компани нь 1998 онд байгуулагдсанаас хойш самнасан ноолуурыг экспортлох чиглэлээр тэргүүлэгчдийн нэг болсон. Сүүлийн жилүүдэд Монгол Улсын нутаг дэвсгэрт байгаль орчинд ээлтэй бизнесийн загварыг бий болгох чиглэлээр үйл ажиллагаагаа явуулж буй юм. 2020 онд энэхүү зорилгодоо амжилттай хүрч, Тогтвортой Ноос Ноолуурын Эвсэл (ТННЭ) -ээс самнасан ноолуурын ул мөрийг мөшгих гэрчилгээ авсан анхны компани болсон билээ.
2. "Монголын Алт" (МАК) ХХК нь 2015 оноос барилгын материалын үйлдвэрлэлээ эхлүүлж, Монгол инженерүүдийн ур ухаанаар дэлхийн стандартад нийцсэн чанартай бүтээгдэхүүн үйлдвэрлэн зах зээлд нийлүүлж байна. MAK Building Materials буюу МАК-ийн барилгын материал үйлдвэрлэлийн хүрээнд олон улсын 100 гаруй компанитай хамтран ажиллаж, барилгын материал үйлдвэрлэлийн салбарт 1500 гаруй ажлын байр бий болгоод байгаа юм. Түүнчлэн ногоон хөгжлийг эрхэмлэх стратегийн хүрээнд усны хаягдалгүй, эрчим хүчний хэмнэлттэй үйлдвэрлэл явуулж, байгальд ээлтэй эцсийн бүтээгдэхүүн үйлдвэрлэж байна.
3. "МСS кока кола" эрчим хүчний зөвлөгөө өгөх чиглэлээр анх 1993 онд үүсгэн байгуулагдсан. Шилжилтийн он жилүүдэд олон салбарт бизнесийн үйл ажиллагаа эрхлэн, улсын нийгэм, эдийн засгийн хөгжилд хувь нэмрээ оруулсаар ирсэн бөгөөд өдгөө татвар шимтгэл, хөрөнгө оруулалт, ажлын байр зэрэг үзүүлэлтээр тэргүүлэгч үндэсний томоохон Групп болоод байна. Аливаа улс орны хөгжлийг шинэ шатанд хүргэдэг дэд бүтэц, эрчим хүч, инженеринг, мэдээлэл, харилцаа холбоо, барилга, үл хөдлөх хөрөнгийн салбар, эдийн засгийг үлэмж тэтгэдэг уул уурхай, өргөн хэрэглээний бараа бүтээгдэхүүнийн салбар, нийгмийн сайн сайхан, хүний хөгжлийг дэмждэг эрүүл мэнд, боловсрол зэрэг чухал салбарт ажилласан он жилүүддээ тогтсон байгууллагын соёлтой, төлөвшсөн боловсон хүчинтэй, түүчээлэх өрсөлдөх чадвартай групп болон тэлжээ.
