Барааны тэмдгийн урьдчилсан хайлт хийхийн ач холбогдол

Брэнд нэр, логонд оюуны өмчийн эрхийн хамгаалалт хийх үйл явц төсөөлснөөс илүү цаг хугацаа шаарддаг. Мэдүүлэг гаргаснаас хойш 6-9 сар хүлээсний эцэст “барааны тэмдгийг” бүртгэхээс татгалзсан урьдчилсан шийдвэрийг хүлээж авах нь таны хүссэн үр дүн биш. Энэ нь цаашлаад бүтээгдэхүүн, үйлчилгээний брэнд нэр, лого, сав баглаа боодол, зар сурталчилгааны агуулгаа өөрчлөх хүртэл хүндрэл учруулдаг. 

ЯАГААД ТАТГАЛЗДАГ ВЭ?

Та өөрийн барааны тэмдгийг Оюуны Өмчийн Газарт бүртгүүлэн онцгой эрх эдлэхээр зэхэж байгаа бол олон улсын гэрээ, конвенцоос гадна Барааны тэмдэг, газарзүйн заалтын тухай хуулийн 5 дугаар зүйлд заасан шаардлагуудыг хангах нь зүйтэй.

ЯМАР ШААРДЛАГА ТАВИГДДАГ ВЭ?

• бараа, үйлчилгээгээ шууд утгаар тайлбарласан (дэлгүүр, жуулчин, талх, кофе, ааруул гэх мэт) бол; 
• бараа, үйлчилгээний шинж чанарыг тодорхойлсон (эко, био, байгальд ээлтэй, шилдэг, хамгийн, анхны гэх мэт) бол; 
• бараа, үйлчилгээний үүсэл гарал, үйлдвэрлэсэн газрын нэрийг заасан (монголд үйлдвэрлэв, япон будаа гэх мэт) бол; 
• өмнөх мэдүүлсэн эсвэл бүртгэгдсэн барааны тэмдэгтэй ижил, төсөөтэй бол Оюуны өмчийн газраас бүртгэхээс татгалзсан шийдвэр гарна.

ИЙМД,

Бизнесийн нүүр царай болсон брэнд нэр, логогоо Оюуны өмчийн газарт мэдүүлэхээс өмнө ижил, төсөөтэй байдал, мөн хуульд заасан шаардлагад нийцсэн эсэх талаар урьдчилсан хайлт хийх нь зүйтэй. 

АНХААР!

Хэрэв гадаад хэлээр брэнд нэрээ илэрхийлсэн бол үндсэн үгээр хайж үзэхээс гадна орчуулга, галиглал, төсөөтэй дуудлагаар хайх шаардлагатай. Жишээ нь таны брэнд “day” бол "day; дэй; хоног; өдөр; цаг хугацаа; khunug" зэрэг хувилбараар хайлт хийнэ. Мөн хөрвүүлж үзэхэд ёс бус үг, хэллэг агуулсан эсэхийг харгалзвал зохино.

ХАЙЛТЫН АЧ ХОЛБОГДОЛ

• Дээр дурдсан шалтгааны улмаас барааны тэмдгийг бүртгэхээс татгалзах урьдчилсан шийдвэр хүлээж авахаас сэргийлнэ. 
• Санаатай болон санамсаргүйгээр хэн нэгний онцгой эрхийг зөрчихгүй байх, уг эрсдлийн улмаас тооцоолоогүй төлбөр тооцоонд унах эрсдлээс сэргийлнэ. 

Харилцагч та барааны тэмдгийн урьдчилсан хайлт хийлгэхийг хүсвэл доорх линкээр хүсэлтээ илгээж, ажлын 1-3 цагийн дотор хайлтын тайланг хүлээж авах боломжтой. 

Нийтлэл бичсэн: С.Дугармаа
Оюуны өмчийн итгэмжлэгдсэн төлөөлөгч
Тусгай зөвшөөрлийн дугаар №119

МҮХАҮТ-ын Патент, барааны тэмдэг, газар зүйн заалтын газар
Утас: 77277070-8
Цахим шуудан: patenttmbur@mongolchamber.mn