Оюуны өмчийн эрхэд хамаарах түгээмэл 5 алдаа
Оюуны өмчийн эрхэд хамаарах дараах таван алдааг бизнес эрхлэгчид түгээмэл гаргаж байна. Үүнд:
АЛДАА НЭГ
Асуудал: Сав баглаа боодол
Дийлэнх компаниуд БНХАУ-д сав баглаа боодлоо захиалгаар хийлгэдэг. Гэтэл Хятад талын түнш компани тэрхүү сав баглаа боодолд өөр бүтээгдэхүүн савлаж, Монголд борлуулж эхлэв.
Шийдэл: Сав баглаа боодлын хэв загвар онцгой, давтагдашгүй өвөрмөц бол бүтээгдэхүүний загварын патент, эсвэл дор хаяж лого, өнгө, брэнд нэртээ барааны тэмдгийн эрхийн хамгаалалт хийж ОӨГ-т бүртгүүлэх. Улмаар Оюуны өмчийн эрхэд хамаарах барааг гаалийн хилээр нэвтрүүлэх журмын дагуу хүсэлт гаргаж, хуурамч барааг зогсоох боломжтой.
АЛДАА ХОЁР
Асуудал: Брэнд нэр
Салбартаа нэр хүндтэй компани боловч брэнд нэр нь БНХАУ-д өөр этгээдийн нэр дээр бүртгэгдсэн тохиолдол бий. Энэ нь Хятадад өөрийн брэнд нэрээр үйл ажиллагаа явуулахад бэрхшээл үүсгэх юм.
Шийдэл: Барааны тэмдэг, патентын эрхийн хамгаалалт нь нутаг дэвсгэрийн хүрээнд хязгаарлагддаг тул экспорт хийж буй улсдаа оюуны өмчөө бүртгүүлж хамгаал.
АЛДАА ГУРАВ
Асуудал: Цаг хугацаа
Хэрэглэгчдийн дунд нэр хүндтэй, олон жил үйл ажиллагаа явуулсан компани. Гэвч оюуны өмчийн эрхийн хамгаалалт хийгээгүйн улмаас хуурамч, дуураймал бүтээгдэхүүний борлуулалтыг зогсоож чадахгүйд хүрэв.
Шийдэл: Аж үйлдвэрийн өмчийн хувьд хэн түрүүлж бүртгүүлсэн нь эрхээ хамгаалах зарчим үйлчилнэ. Мөн Хуульд заасан боломжит хугацаануудыг тооцоолох шаардлагатай.
АЛДАА ДӨРӨВ
Асуудал: Буруу ойлголт
Оюуны өмчид хамаарах зөрчлийг Таны өмнөөс хэн нэгэн цагдаа, хуулийн байгууллага мөрдөж шалгана гэж буруу ойлгодог. Хүн бүр аюулгүй байдлаа хангаж, гэрийнхээ хаалга үүдийг цоожлоод гардаг шиг Та ч бас өөрийн өмчид хариуцлагатай хандаж, зохих арга хэмжээг авах буюу эрхийн хамгаалалттайг бусдад сануулж түгээ. Мөн Таны эрхийг зөрчиж байгаа этгээдийг олж шаардлага тавь. Гагцхүү үүний дараагаар Оюуны өмчийн газрын Хяналт, шалгалтын газарт гомдол гаргах боломжтой болох юм.
АЛДАА ТАВ
Асуудал: Буруу ойлголт
Бизнесээ “патентжуулна” гэх нэрээр “монополь” үйл ажиллагаа эрхлэхийг зорьдог.
Шийдэл: “Патент” гэдэг нь техник, технологийн түвшин ахиулсан, үйлдвэрлэх боломжтой цоо шинэ бүтээгдэхүүн, түүнийг үйлдвэрлэх аргад хамаарна. Патент бол оюуны өмчийн эрхийн хамгаалалтын төрлүүдээс хамгийн өндөр шалгууртай төрөл юм. Иймд оюуны өмчийн эрхийн хамгаалалтын төрлүүдийн ялгаа, тэдгээрт тавигддаг шаардлагуудыг дараах холбоосоор орж үзнэ үү.
Нийтлэл бичсэн: С.Дүүрэнжаргал
Оюуны өмчийн итгэмжлэгдсэн төлөөлөгч
Тусгай зөвшөөрлийн дугаар №068
МҮХАҮТ-ын Патент, барааны тэмдэг, газар зүйн заалтын газар
Утас: 77277070-8
Цахим шуудан: duurenjargal@mongolchamber.mn; patenttmbur@mongolchamber.mn
