Ургамлын идээлэгтэй сарлагийн био арьс, арьсан бүтээгдэхүүн зах зээлд нэвтрүүлэх төслийн багийнхан уулзлаа
“Монгол Улсад ургамлын идээлэгтэй сарлагийн арьс шир ба арьсан бүтээгдэхүүний кластерийн био-арьс болон био-арьсан бүтээгдэхүүн үйлдвэрлэх чадавхийг бэхжүүлэх төсөл”-ийг хамтран хэрэгжүүлэгч байгууллагуудын уулзалт боллоо. Уг төсөл нь Европын холбооны санхүүжилттэй, Свитч Азиа (SWITCH-Asia) тэтгэлэгт хөтөлбөрийн хүрээнд хэрэгжиж уй төсөл юм.
Уулзалтаар төслийн үйл ажиллагаа болон төслийн хүрээнд хэрэгжих ажлуудын талаар санал солилцов. Уг төсөл нь 2025 он хүртэл хэрэгжих бөгөөд төслийн дүнд ургамлын идээлэгтэй шинэ нэр төрлийн сарлагийн био арьс болон био арьсан бүтээгдэхүүнийг зах зээлд нэвтрүүлэх, үйлдвэрлэх, эцсийн боловсруулалт хийх технологийг сайжруулах, мөн арьс ширний үйлдвэрийн ажилтнуудын чадавхийг дээшлүүлнэ.
Уулзалтад Грекийн Европеан Профайлс С.А. (European Profiles S.A.) төслийн ерөнхий зохицуулагч Алексиа Заглара, төслийн менежер Иан Леач, ВАКАКИС (VAKAKIS) Зөвлөх компанийн үйл ажиллагаа хариуцсан захирал Костас Хатзианнис, Испанийн Технологи, инновацийн төв (INESCOP) төслийн менежер Эсперанза Алмодовар, МҮХАҮТ-ын Төсөл Хөтөлбөрийн газрын дарга А.Энэрэл, Монголын арьс шир үйлдвэрлэлийн холбооны Удирдах зөвлөлийн дарга С.Даваажав, төслийн менежер Б.Ууганбаяр болон “Брэнд Гутал” ХХК-ийн гүйцэтгэх захирал Б.Гэрэлт-Од нар оролцлоо.
Мөн төслийн хүрээнд кластерийн гишүүдэд “Олон улсын арьс ширний LWG стандарт болон ургамлын идээлэгтэй сарлагийн арьсан бүтээгдэхүүний нийлүүлэлтийн сүлжээн дэх үнэ цэнэ” сэдэвт таван өдрийн сургалтыг Испани улсын эксперт Борха Матеу удирдан явуулсан юм. Улмаар өнөөдөр сургалтад хамрагдсан хүмүүст сургалтын сертификат гардууллаа.
