62 дахь удаагийн БАЗААР БЕРЛИН үзэсгэлэн амжилттай нээгдлээ

ХБНГУ-ын Берлин хотноо уламжлал болгон зохион байгуулагддаг Базаар Берлин үзэсгэлэн 2024 оны 11 дүгээр сарын 6-10-ний өдрүүдэд явагдаж байна. МҮХАҮТ болон Европын холбооноос санхүүжилттэй Монгол Улс дахь олон улсын худалдааг дэмжих төсөл /ITDM/ хамтран Танхимын болон кластерийн гишүүн байгууллагуудыг оролцууллаа. 
Монголын үндэсний павильонд 11 байгууллага Монгол Улсад үйлдвэрлэсэн арьс ширэн бүтээгдэхүүн, мод, модон эдлэл бэлэг дурсгал, ноолуур, сарлагийн хөөвөр, гоо сайхны бараа бүтээгдэхүүний дээжийг дэлгэн сурталчилж ,түншийн харилцаа тогтоон оролцож байна. 

Нээлтийн арга хэмжээнд Монгол Улсаас ХБНГУ-д суугаа онц бөгөөд бүрэн эрхт Элчин сайд Б.Мандахбилэг болон холбогдох албаны хүмүүс хүрэлцэн ирж амжилт хүссэн бөгөөд үндэсний хөөмий, морин хуурын үзүүлбэр зэрэг урлаг соёлын тоглолтуудыг Герман Улсын иргэдэд толилууллаа. Үзэсгэлэн 2024 оны 11 дүгээр сарын 10 хүртэл Мессе Берлин үзэсгэлэнгийн танхимд үргэлжилэх юм.  

Үзэсгэлэнд  Агни ХХК, Бэсүд соёл ХХК, Гурван сор ХХК, Нана коллекшн, Дэнд ХХК, Эм жи кашмер ХХК, Зузу кашмер ХХК, Элээн хаус ХХК, Гоо сайхны кластер, Берлин дэх Монголын мэдээлэл худалдааг дэмжих Европын төв, Фрайбург хот дахь Монголын соёлын төв зэрэг байгуулагууд оролцож байна.
62 дах удаагийн BAZAAR BERLIN нь Германы  хамгийн том бэлэг дурсгалын худалдааны үзэсгэлэн бөгөөд гар урлал, бэлэг дурсгал, гэр ахуйн жижиг хэрэглэлүүд зэрэг 60 гаруй орноос ирсэн олон улсын бараа бүтээгдэхүүнийг нэг дор танилцуулж, борлуулдагаараа онцлог билээ. 
МҮХАҮТ сүүлийн 10 гаруй жил тасралтгүй энэхүү үзэсгэлэнд бизнес эрхлэгчидээ оролцуулж байгаа юм.