Монгол улсад анх удаа Цахилгаан хангамж, тоног төхөөрөмжийн ашиглалтын мэргэжлээр ажиллангаа суралцах боломжтой боллоо
Өнөөдөр /2024.11.05/ Налайхын Политехник коллежид Монгол улсад анх удаа Цахилгаан хангамж, тоног төхөөрөмжийн ашиглалтын мэргэжлээр ажиллангаа суралцах боломжтой Хосмог сургалтын нээлт боллоо. Мэргэжлийн боловсролын хосмог сургалт нь нийгэм, ажил олгогч, суралцагч зэрэг бүх оролцогч талуудад харилцан ашигтай, олон улсад хүлээн зөвшөөрөгдсөн, шалгарсан үр дүнтэй сургалтын хэлбэр юм.
МҮХАҮТ-ын хувьд үндэсний болон олон улсын хэмжээнд хүлээн зөвшөөрөгдсөн хосмог сургалтын тогтолцоог Монгол Улсад нутагшуулах хөгжүүлэх санамж бичгийг 2024 оны 3-р сард Боловсролын яамтай байгуулсан. Улмаар хувийн хэвшлийн төлөөллийн байгууллагын хувьд Төр-Хувийн хэвшлийн урт хугацааны тогтвортой үргэлжлэх хамтын ажиллагааг бий болгох зорилгоор МҮХАҮТ-ын дэргэд сургалтын газар байгуулсан билээ.
Боловсролын яамны Мэргэжлийн болон техникийн боловсролын газрын дарга Өлзийцэцэг Налайхын Политехник коллежийн Хосмог сургалтыг нээж хэлсэн үгэндээ “Монголын боловсролын салбарт хосмог сургалтын тогтолцоог шинээр нэвтрүүллээ. Хөдөлмөрийн зах зээл дээр ур чадвартай, ажил олгогчийн шаардлагад нийцсэн суралцагчдыг бэлтгэх боломж бүрдэж байгаа юм” гэдгийг онцолсон юм.
МҮХАҮТ-ын дэд дарга Ц.Магнайбаатар сургалтыг нээж үг хэлэхдээ “ААНБ-уудад чадварлаг мэргэжилтэй ажилтан дутмаг байгаа. Нөгөө талаас нийгэмд ажилгүйдэл их байгаа өнөө үед энэхүү Хосмог сургалтын тогтолцоо үүсэж эхэлж байгаа нь тун оновчтой шийдэл юм. Цаашид Монголын үндэсний худалдаа аж үйлдвэрийн танхим Мэргэжлийн Боловсролын салбарт орж, Монгол Улсын мэргэжилтэй боловсон хүчин бэлдэх үйл ажиллагаанд манлайлан оролцоно. Хүн ам зүйн шалтгаантай ажиллах хүчний хомсдолыг дагаад ААНБ, компаниудад бүтээмжээ дээшлүүлэх хөрөнгө оруулалтууд, шинэ технологи, тоног төхөөрөмжүүдийг урт хугацаанд зөв зохистой ажиллуулах мэргэжлийн өндөр ур чадвартай ажилтан шаардлагатай байна. Тиймээс ААНБ-Сургууль хамтран ажлын байранд шаардлагатай ур чадварыг сургалтын хугацаанд бүрэн олгох зорилготой. Мөн сургалт оновчтой болсноор компани дахин сургах зардал гаргаж, цаг хугацаа алдахгүй. Төгсөгч шууд туршлагатай ажилтны хэмжээнд цалинжих боломжтой болох юм ” хэмээлээ.
Мөн энэ үеэр Боловсролын сайд П.Наранбаяр “Монголын боловсролын системд өнөөдөр маш чухал ажил эхэлж байна. Ажиллангаа, цалингаа авангаа гурван жил суралцаад мэргэжлийн бүрэн эрхтэй, мөн ажлын байрны 100 хувийн баталгаатай үлдэх юм. Монголд цахилгаанчин мэргэжил маш дутмаг байдаг. Тиймээс цахилгаанчдыг ажлын байрандаа ажиллаад дадлагажиж байх хугацаанд нь бэлдэх боломжтой болж байна. Аж ахуй нэгж, сургалтын байгууллага буюу Мэргэжлийн боловсролын сургууль, МҮХАҮТ, Боловсролын яам гурвалсан харилцаа үүсгэж байна гэсэн үг. Бүх хүн дээд сургуулиар дамжиж бэлтгэгдэнэ гэж байхгүй. Өнөөдөр компани, аж ахуй нэгжид байгаа боловсон хүчин, хүний нөөцийн дутагдлыг арилгахад хамгийн чухал үйл ажиллагаа болж байна. Нэгдүгээр курстээ 70 хувь, хоёрдугаар курстээ 50 хувь, гуравдугаар курстээ 30 хувь онолын хичээл үзнэ. Бусад үед дандаа ажиллаад явна гэсэн үг” гэлээ.
