ХХААХҮ-ийн сайд Ч.Улаан "Business Breakfast" уулзалтад оролцож байна
Төр, хувийн хэвшлийн хэлэлцэлийг хөгжүүлэх, хамтын ажиллагааг өргөжүүлэх, бодлого боловсруулах, хэрэгжүүлэхэд бизнес эрхлэгчдийн санал, оролцоог нэмэгдүүлэх зорилготой "Business breakfast" уулзалт эхэллээ.
Энэ удаагийн "Business breakfast" уулзалтын зочноор Монгол Улсын Засгийн Газрын Гишүүн, ХХААХҮ-ийн сайд Ч.Улаан уригдан бизнес эрхлэгчидтэй санал бодлоо солилцож байна.
Tehnoj байгууллагын захирал Г.Галаарийдий: Хөдөө аж ахуйн салбарт маш их судалгаа хийгдсэн байдаг хэрнээ далд, нууцлаг байдаг. Судалгаа болон шинжилгээний мэдээллүүдээ нэгтгэж, малын өвчлөл зэргийг нэгдсэн дататай болгосноор хууль боловсруулахад хамгийн том дэмжлэг болж чадна. Хөдөө аж ахуйн нэгдсэн том дата сүлжээг бий болгоё.
MCPT компанийн үүсгэн байгуулагч н.Пүрэв: Жижиг дунд үйлдвэрлэлийн зээл авахаар зээлийн хүүний зөрүүнд маш их хэмжээний мөнгө төлж алдагдалд ордог. Зээлээ цаг хугацаанд нь төлж байгаа аж ахуйн нэгжүүдэд зээлийн хүүгийн хөнгөлөлт болон хөнгөлөлттэй зээлийн боломжийг бодитой шийдэж өгмөөр байна.
“Сор кашмер” ХХК-ийн захирал Л.Болдбаатар: Өнөөдрийн байдлаар Монгол Улсын нийт ноолуурын 18-20 хувийг л дотооддоо гүн боловсруулалт хийж байгаа. Үлдсэн 80 хувийг нь БНХАУ-руу угаасан байдлаар гаргаж байгаа. БНХАУ-ын Засгийн газар боловсруулаагүй ноос, ноолуур импортлохыг хориглосны ачаар Монголд ноос, ноолуур угаах үйлдвэрлэл хөгжиж байна. Үүн дээр суурилаад цаашид ноос самнах үйлдвэрийг хөгжүүлэх шаардлагатай байна. Салбарын яамнаас зүгээс бодлогоор дэмжих хэрэгтэй байна.
Преком ХХК-ийн захирал Б.Мөнхзаяа: "Махны салбарыг зохицуулж байгаа хууль дүрмүүд хангалттай байгаа. Гагцхүү түүнийгээ хэрэгжүүлэх тал алдаа дутагдалтай байгаа учир үр дүн гарахгүй байна. Тиймээс араас нь хөөцөлдөх биш өмнөөс нь угтаж үйлчилгээгээ бэлддэг тогтолцоог бий болгомоор байна. Жишээлбэл, дулааны аргаар боловсруулсан мах, махан бүтээгдэхүүний экспортод хориг тавьсанаар энэ чиглэлд хөрөнгө оруулалт хийгээд байсан олон бизнес эрхлэгчид хүндээр тусаад байна. Хэрэв энэ асуудлыг урьтаж зөвлөлдөж мэдсэн бол тэд хөрөнгөө илүү үр дүнтэй зүйлд зарцуулж болох байсан. Энэ мэт нөхцөл байдлыг урьдчилж харж, мэдээлдэг, санаа оноо солилцдог баймаар байна"