“Хятадын Олон Улсын Импортын VII Экспо”-д аж ахуй нэгжийн төлөөллүүд оролцож байна
Монгол Улсын Ерөнхий сайд Л.Оюун-Эрдэнэ Бүгд Найрамдах Хятад Ард Улсад ажлын айлчлал хийж байна.
Тэрээр өнөөдөр /2024.11.05/ БНХАУ-ын Шанхай хотод эхлэх “Хятадын олон улсын импортын VII Экспо”-д оролцож үг хэлнэ. Мөн айлчлалын хүрээнд БНХАУ-ын Ерөнхий сайд Ли Чянтай уулзах юм. Энэ онд Монгол Улс, БНХАУ-ын хооронд дипломат харилцаа тогтоосны 75 жилийн ой тохиож буй бөгөөд Ерөнхий сайдын энэ удаагийн айлчлал нь Монгол, Хятадын Иж бүрэн стратегийн түншлэлийн харилцааг өргөжүүлэн хөгжүүлэх, бүхий л салбарын бодит хамтын ажиллагааг эрчимжүүлэхэд чиглэж байна.
Энэхүү айлчлалд МҮХАҮТ-ын гүйцэтгэх захирал Т.Дүүрэн аж ахуй нэгжүүдийн төлөөлөлтэй хамт оролцож буй юм. Тэд БНХАУ-ын Шанхай хотноо 2024.11.05-10 өдрүүдэд зохион байгуулах “Хятадын Олон Улсын Импортын VII Экспо”-той танилцах болон тус арга хэмжээний хүрээнд зохион байгуулах Монгол Хятадын “Замын-Үүд, Эрээн боомтын эдийн засаг, хамтын ажиллагааны бүс” хөрөнгө оруулалтын хуралдаанд оролцоно.
Экспог зургаан жил дарааллан амжилттай зохион байгуулсан бөгөөд жил бүр цар хүрээгээ тэлж, өнгөрсөн онд 128 орны 3400 гаруй аж ахуйн нэгжүүд оролцож, нийт 410,000 хүн үзэж сонирхсон байна. Дэлхийн 128 орны төлөөлөл шилдэг аж ахуйн нэгжүүд, салбарын удирдлага, хөрөнгө оруулагчидтай нэгэн дээвэр дор цуглан хамтын ажиллагаагаа өргөжүүлэх, туршлага солилцох, бизнесийн шинэ түнштэй болох мөн түүнчлэн Хятад улсад бараа бүтээгдэхүүнээ экспортлох болон хамтын ажиллагаагаа өргөжүүлэх нь экспогийн гол зорилго юм.
