"Монгол - Францын бизнес уулзалт" болж, ХХБ болон Францын төрийн өмчит хөрөнгө оруулалтын банк хооронд санамж бичиг байгууллаа
Монгол-Францын бизнесийн зөвлөлийн ерөнхийлөгч, “Орано” группын ТУЗ-ийн дарга Клод Имован Францын бизнес төлөөлөгчдийг ахлан Монгол Улсад айлчилж байна. Энэ хүрээнд Монгол-Францын Монгол - Францын бизнес уулзалт өнөөдөр МҮХАҮТ-д боллоо. Уулзалтыг нээж, Бүгд Найрамдах Франц Улсаас Монгол Улсад суугаа онц бөгөөд бүрэн эрхт элчин сайд эрхэмсэг хатагтай Коринн Пэрера Да Силва, ГХЯ-ны Олон улсын худалдаа эдийн засгийн газрын захирал Г.Өлзийсайхан, МҮХАҮТ-ын гүйцэтгэх захирал Т.Дүүрэн, “Монгол, Францын бизнес зөвлөл”-ийн Ерөнхийлөгч бөгөөд “Орано” группын ТУЗ-ын дарга Клод Имован нарын хүмүүс үг хэлэв.
Франц Монголын бизнес зөвлөлийн уулзалтад хоёр улсын маш олон компани оролцож, хамтарч ажиллах хүсэл сонирхлоо илэрхийлж байгаа нь манай улсын бизнес эрхлэгчдэд Франц болон Европыг чиглэсэн хамтын ажиллагаа илүү эерэг, таатай болох хүлээлтийн илрэл гэдгийг МҮХАҮТ-ын гүйцэтгэх захирал Т.Дүүрэн онцоллоо.
Тэрбээр “Европт анхны салбар танхимаа нээхээр бэлтгэл ажилдаа орсон. Оны сүүлээр нээгээд, францын болон ойр стратегийн улсуудын гишүүнчлэлийг татаж, Монгол Франц, Европын бизнесийг ойртуулах зорилготой байна. Өнөөдрийн уулзалтад Францын өндөр зэрэглэлийн том компаниуд ирсэн байна. Манай улсад ямар их ач холбогдол өгч байгааг нь харж байна. Энэ боломжийг нь алдахгүй ашиглах ёстой. Төрийн өмчит том хөрөнгө оруулалтын банк нь ирсэн байна. Сонирхолтой төслүүд байвал бид хамтарч ажиллахад бэлэн байна гэдгээ илэрхийллээ. Хиймэл дагуул, галт тэрэгний сүлжээ компани гэх мэт. Одоохондоо Монгол Францын худалдаа, хамтын ажиллагаа тэнцвэргүй байдалд байна. Монгол Улс Францаас 100 гаруй сая ам.долларын бүтээгдэхүүн импортлоод буцаагаад 25 орчим сая ам.долларын бүтээгдэхүүн экспортолж байна. Үндсэндээ ноолуур болон зарим нэг уул уурхайн бүтээгдэхүүнээр хязгаарлагдаж байна” хэмээсэн юм.
Ингээд уулзалтын үеэр Францын компани аж ахуй нэгжүүдийн удирдлага, төлөөллүүд өөрсдийгөө танилцуулсны дараа Францын төрийн өмчит хөрөнгө оруулалтын банк болох BPIFRANCE, Худалдаа хөгжлийн банк хооронд хамтын ажиллагааны санамж бичиг байгууллаа.
Энэхүү санамж бичгийн ач холбогдлын талаар Худалдаа хөгжлийн банкны гүйцэтгэх захирал О.Орхон хэлэхдээ “BPIFRANCE бол Франц улсын төрийн өмчтэй, маш том хөрөнгө оруулалтын банк. Бид энэ банктай холбоо тогтоох гэж нэлээд олон жилийн хөдөлмөр зарцуулсан. Эцэст нь хамтын ажиллагааны санамж бичигт гарын үсэг зурж чадлаа. Ер нь бол манай банкны гадаад харилцаатай 300 гаруй түншийн маань 30 гаруй хувь нь Европын холбоонд байдаг. Тэр дотроо Франц маш бага хувийг эзэлж байсан учраас энэ стратегийн хувьд маш чухал хамтын ажиллагаа болох байх гэж найдаж байна” хэмээсэн юм.
