МҮХАҮТ-ын гишүүн байгуулагуудад “Эрэгтэй, эмэгтэй хүний дундаж наслалтын зөрүүг багасгах талаар 2027 он хүртэлх төлөвлөгөө"-г танилцууллаа

Монгол Улсын Засгийн Газар, Жендэрийн Үндэсний Хороо Монгол Улсын Ерөнхий сайдын 71 дүгээр захирамжаар батлагдсан “Эрэгтэй, эмэгтэй хүний дундаж наслалтын зөрүүг багасгах талаар авч хэрэгжүүлэх арга хэмжээний төлөвлөгөө (2024-2027)”-г үндэсний хэмжээнд танилцуулах ажлыг зохион байгуулж байна.

Энэ хүрээнд өнөөдөр /2024.10.25/ тус төлөвлөгөөний хэрэгжилтийг хангахад хувь нэмрээ оруулан ажиллах МҮХАҮТ-ын зарим гишүүн байгууллагууд болон орон нутгийн бизнес эрхлэгчдэд дээрх төлөвлөгөөг танилцууллаа.

Тодруулбал, эрэгтэй, эмэгтэй хүний дундаж наслалтын зөрүүг багасгах талаар авч хэрэгжүүлэх арга хэмжээний төлөвлөгөө болон цаашид хэрхэн хэрэгжүүлэх гарц, шийдлийн талаар Жендэрийн Үндэсний Хорооны ажлын албаны Эрэгтэйчүүдийн хөгжлийн асуудал хариуцсан мэргэжилтэн Д.Батхишиг мэдээлэл хийлээ.  

Тус хорооны зүгээс 10000 эрчүүдийн дунд судалгаа явуулж эрэгтэй хүмүүс эмэгтэйчүүдээс 9.6 жилээр  богино наслаад байгаа учир шалтгаануудыг хайсан.  Ингээд энэ наслалтын зөрүүг арилгах төлөвлөгөөний дөрвөн зорилт боловсруулсан талаар дэлгэрэнгүй танилцуулсан юм.

1. Хөвгүүд, эрэгтэйчүүдийн эрүүл зан үйл, амьдралын зөв дадал, хэвшлийг сайжруулах замаар чанартай урт наслалтыг дэмжих
2. Эрүүл мэндийн урьдчилан сэргийлэх үзлэгт эрэгтэйчүүдийн хамрагдалт, оролцоог тогтмолжуулах
3. Зам тээврийн ослыг бууруулах, урьдчилан сэргийлэх, холбогдох хууль тогтоомжийн хэрэгжилтийг сайжруулах замаар эрэгтэйчүүдийн осол гэмтэл, зуурдын нас баралтыг бууруулах
4. Үндэсний хэмжээнд хүйсээр ангилсан мэдээллийг өргөтгөн сайжруулах, жендерийн дүн шинжилгээ хийх, хөгжлийн бодлогод тусгах замаар олон талт хамтын ажиллагааг дэмжих