МҮХАҮТ-ын ээлжит бус XXII их хурлаар Ерөнхийлөгчийг нөхөн сонгоно

МҮХАҮТ-ын Удирдах Зөвлөлийн 10-р сарын 16-ны өдрийн хурлаас МҮХАҮТ-ын ээлжит бус XXII их хурлыг 2024 оны 11 дүгээр сарын 4 дэх долоо хоногт хийхээр шийдвэрлэлээ.

МҮХАҮТ-ын дүрэмд зааснаар Үндэсний танхим нь байгууллага, аж ахуйн нэгж, иргэдийн үүсгэл санаачилга, гишүүнчлэлийн үндсэн дээр байгуулагдаж, өөрөө удирдах ёсонд тулгуурлан “Худалдаа, аж үйлдвэрийн танхимын тухай” Монгол Улсын хууль болон МҮХАҮТ-ын дүрэмд заасан эрх, үүргээ хэрэгжүүлэхтэй холбогдсон үйл ажиллагаа явуулах, төвийг сахисан, нийгэмд үйлчилдэг төрийн бус байгууллага юм.

МҮХАҮТ-ын ээлжит бус XXII их хурлаар МҮХАҮТ-ын Ерөнхийлөгчийг нөхөн сонгох, батлах асуудлыг хэлэлцэнэ. МҮХАҮТ-ын Ерөнхийлөгч нь танхимын Удирдах зөвлөлийн дарга байх бөгөөд Үндэсний танхимыг гадаад, дотоодод төлөөлөх, Удирдах зөвлөлөөс олгосон болон Дүрэмд заасан эрх хэмжээний хүрээнд танхимын үйл ажиллагааг удирдан чиглүүлэх, танхимын олон улсын хамтын ажиллагааг идэвхжүүлэх, УИХ, Засгийн газар, төрийн болоод төрийн бус байгууллагуудтай гишүүд, бизнес эрхлэгчдийн эрх ашгийг төлөөлөн хамгаалах асуудлаар хамтарч ажиллах үндсэн чиг үүрэгтэй.

МҮХАҮТ-ын дүрмийн 4.2.1-т зааснаар танхимын гишүүн нь харъяалагдах танхимын удирдах байгууллагыг сонгох ба түүнд сонгогдох, 4.2.2-т зааснаар Үндэсний танхимын Их хуралд оролцож хурлаар хэлэлцэж байгаа асуудлаар санал бодлоо илэрхийлэх эрх, үүрэгтэй.

Танхимын Ерөнхийлөгчид нэр дэвшигчид товч намтар, мөрийн хөтөлбөрөө бэлтгэн Их хурлын товлосон өдрөөс хоёр хоногийн өмнө 17:00 цагаар тасалбар болгон МҮХАҮТ-ын байр, 403 тоот буюу Нэр дэвшүүлэх комисст хүлээлгэн өгнө.

МҮХАҮТ-ын ээлжит бус Их хуралд МАНДАТ-ын эрхтэй оролцох гишүүдэд тавигдах шаардлага:

• 2024 оны гишүүнчлэлийн хураамжаа 11 дүгээр сарын 15-ны өдрийн дотор бүрэн төлсөн байх
• Шинэ гишүүд 2024 оны 6 дугаар сарын 3-ны өдрөөс өмнө элссэн байх
• Ээлжит бус их хуралд гишүүн байгууллага тус бүр НЭГ саналын эрхтэй байх ба шийдвэр гаргах түвшний удирдах албан тушаалтан эсвэл түүний итгэмжлэгдсэн бие төлөөлөгч оролцоно. /итгэмжлэлгүй тохиолдолд хуралд оролцох, санал өгөх эрхгүй/

Иймд гишүүд  хураамжаа төлж ээлжит бус их хуралд оролцох саналын эрхээ баталгаажуулна уу. 

Жич: Ээлжит бус их хурлыг зохион байгуулах танхимыг сонгосны дараа өдөр газрыг тодотгон зарлана.

Бүртгэл, гишүүнчлэлтэй холбоо мэдээлэл:
Утас: 77277070 /2/, 99046587, 99024934
Цахим шуудан: membership@mongolchamber.mn
Цахим хуудас: www.mongolchamber.mn
МҮХАҮТ-ын байр, 305 тоот

Нэр дэвшихтэй холбоотой мэдээлэл:
Утас: 88444121, 99034043
Цахим шуудан: policy@mongolchamber.mn
МҮХАҮТ-ын байр, 403 тоот