Бизнес эрхлэгчид хууль батлагдсаны дараа биш хэлэлцэх явцад оролцох хэрэгтэй
Эрх зүйн реформын Олон улсын эксперт, ахлах зөвлөх Чарльз Хэнри Монтиний оролцсон “RIA буюу Хууль тогтоомжийн үр нөлөөний үнэлгээ, олон улсын туршлага, хэрхэн Монгол Улсад оновчтой хэрэгжүүлэх зөв арга зам, аргачлал” сэдэвт БИЗНЕС ӨГЛӨӨНИЙ ЦАЙ хэлэлцүүлэг, уулзалт амжилттай зохиогдлоо.
О.АМАРТҮВШИН: БИЗНЕС ЭРХЛЭГЧИД ХУУЛЬ БАТЛАГДСАНЫ ДАРАА БИШ ХЭЛЭЛЦЭХ ЯВЦАД ОРОЛЦОХ ХЭРЭГТЭЙ
Хэлэлцүүлгийн үеэр МҮХАҮТ-ын Ерөнхийлөгч О.Амартүвшин хэлэхдээ "Хуулийн төслийг хэлэлцэх үйл явцад хувийн хэвшлийн байгууллагууд оролцдоггүй, хэрэгжих хугацаа нь болоогүй гэдэг ч юм уу нэг их ач холбогдол өгдөггүй. Харин хууль батлагдаад хэрэгжиж эхэлмэгц санал гомдлоо ярьж эхэлдэг. Иймээс өнөөдрөөс эхлээд хуулийн төслийг эхлэх үед нь санал бодлоо нэг дуугаар хүргэж хууль, тогтоомжийн үр нөлөөллийн үнэлгээ, түүнийг тойрсон олон асуудлуудыг хөндөж бизнесийн эрх зүйн орчноо сайжруулахын тулд хүч боломжоо нэгтгэн хамтран ажиллахыг уриалж байна" гэлээ.
Чарльз Хэнри Монтин нь Засгийн газар, болон харьяа байгууллагаас гаргасан хуулийн бодлого, хэрэгжүүлэлтийн шинжилгээ, үнэлгээний талаар зөвөлгөө өгөх, удирдах албан тушаалтнуудад зориулан сургалт явуулах, хуулийн хэрэгжилтэнд үнэлгээ, дүгнэлт өгөх зэрэг чиглэлээр ажилладаг бөгөөд Төрийн удирдлага, хуулийн хэрэгжүүлэлтийн чиглэлээр Францын үндэсний болон Олон улсын түвшинд NATO, Европын холбоо, Эдийн засгийн хамтын ажиллагаа, хөгжлийн байгууллага /OECD/, Дэлхийн банк зэрэг байгууллагад шинжээч, ахлах зөвлөх, зөвлөхөөр амжилттай ажиллаж байсан арвин их туршлагатай зөвлөх юм. Тэрээр 2004 оноос хойш дэлхийн 30 гаруй оронд ажилласан байна.
