Австралийн Парламентийн Сенатын Танхимын Ерөнхийлөгч Сью Лайнес МҮХАҮТ-ын дэргэдэх “Бизнес эрхлэгч эмэгтэйчүүдийн төв”-өөр зочиллоо
Австрали Улсын Парламентын Сенатын Танхимын Ерөнхийлөгч эрхэмсэг хатагтай Сью Лайнес тэргүүтэй төлөөлөгчид Монгол Улсад хийсэн айлчлалынхаа хүрээнд Азийн сангийн “Бизнес эрхлэгч эмэгтэйчүүдийн төв” (БЭЭТ)-өөр зочиллоо. “Бизнес эрхлэгч эмэгтэйчүүдийн төв” нь Монголын Үндэсний Худалдаа Аж Үйлдвэрийн Танхим (МҮХАҮТ)-ын дэргэд нээгдсэн бөгөөд энэ үеэр бизнес эрхлэгч эмэгтэйчүүдийн төлөөлөл бараа бүтээгдэхүүнээ дэлгэж угтав.
Тус уулзалтад Монгол Улсад суугаа Австрали Улсын бүрэн эрхт Элчин сайд хатагтай Кэйти Смит Азийн сангийн суурин төлөөлөгч Сара Таялор, МҮХАҮТ-ын Гүйцэтгэх захирал Т.Дүүрэн, дэд захирал Ц.Магнайбаатар нар оролцсон юм.
Уулзалтын үеэр Бизнес эрхлэгч эмэгтэйчүүдийн төвийн танилцуулга, "URECA" ХХК-ийн "Нүүрсээс нарны эрчим хүч рүү" шинэлэг санаачилга илтгэл, бизнес эрхлэгч эмэгтэйчүүдийн бараа бүтээгдэхүүний үзэсгэлэн худалдааг зохион байгууллаа.
Бизнес эрхлэгч эмэгтэйчүүдийн төвийн "Бизнес Инкубатор" хөтөлбөрийн төгсөгчдийн төлөөллөөс эсгий үйлдвэрлэлийн "JaSu" брэндийн үүсгэн байгуулагч Д.Жаргалсүрэн, "Ногоодой" ногооны шүүс үйлдвэрлэлийг үүсгэн байгуулагч Б.Туяа нар өөрсдийн санаагаа ажил болгон хэрэгжүүлж, олон улс болоод дотоодын гарааны бизнесийг дэмжих төсөл, хөтөлбөрүүдэд амжилттай оролцсон түүх, дэлхийн стандартуудыг бичил бизнестээ хэрхэн хэрэгжүүлж буй тухайгаа энэ үеэр хуваалцлаа.
