Хөвсгөл аймгийн бизнес эрхлэгчид “АПУ” ХХК, “Спирт бал бурам” ХХК-ийн үйлдвэртэй танилцаж, туршлага судална
МҮХАҮТ-ын Хөвсгөл аймгийн салбар танхимын дарга Д.Гэрэлтуяа аймгийнхаа бизнес эрхлэгчидтэй хамт Улаанбаатар хотод байрлах “АПУ” ХХК, Сэлэнгэ аймгийн Мандал сум дахь “Спирт бал бурам”-ын үйлдвэртэй танилцах бизнес аялал зохион байгуулж байна.
Үүний хүрээнд өнөөдөр Улаанбаатар хотод ирсэн бөгөөд МҮХАҮТ-ын дэд дарга Ц.Магнайбаатар тэднийг хүлээн авч уулзлаа. Дэд дарга Ц.Магнайбаатар аж ахуй нэгжүүдэд МҮХАҮТ-ын газар хэлтсүүдийг танилцуулж, цаашид хийж хэрэгжүүлэх ажил, орон нутгийн бизнес эрхлэгчдээ хэрхэн дэмжих боломж байгаа талаар ярилцаж, мэдээлэл солилцлоо.
Энэ үеэр Хөвсгөл аймгийн бизнес эрхлэгч, "Шинэ амттан" ХХК-ийн захирал Б.Баярбат санал хэлэв. Тус компани нь жимсний чанамал, жимсний шүүс үйлдвэрлэдэг юм байна. Тэрбээр “Орон нутгийн бизнес эрхлэгчдэд тулгарч байгаа хүндрэл бол ерөөсөө л борлуулалт. Хотын хэдэн сүлжээ дэлгүүрүүдээр өгөөд явна. Орон нутгийн бүтээгдэхүүн мэдээж өнгө зүс савалгаанаас эхлээд учир дутагдал бий. Гэхдээ манайх бол нэлээд сайжруулсан. Гэтэл хэдэн сүлжээ дэлгүүр барааг маань дээр гаргаад ч өрдөггүй. Автомат захиалганд орчихсон гэдэг. Менежерүүд нь ойлгохыг хүсдэггүй. Дөнгөж нийлүүлж эхэлж байгаа барааг буцаахаар болдог. Программ нь ийм гэдэг шалтаг хэлдэг. Нийтлэг дүр зураг. Тооцоогоо хийнэ гэж байхгүй. Дээж өгөөд танилцуулахаар буцаагаад хаячихдаг. Үндэсний үйлдвэрлэгчдийн хийж байгаа бараа бүтээгдэхүүн маш бага, өчүүхэн зах зээл эзэлдэг. Гаднаас асар ихээр нь бараа импортолдог хэрнээ үндэсний хэдэн сүлжээ дэлгүүрүүд биднийг харж үзэж болдоггүй юм болов уу. Энэ олон уул уурхайн компаниуд яагаад дотоодын үйлдвэрлэгчдээ дэмжихгүй байна вэ. Маш олон уурхайд санал тавьсан. Ер нь л авахгүй шүү дээ. МҮХАҮТ-аас энэ талаар анхаарч, шийдвэрлэж өгөх боломж бий юу” гэлээ.
МҮХАҮТ-ын дэд дарга Ц.Магнайбаатар хэлэхдээ “Дотоодын аж ахуй нэгжүүдэд зориулсан тусгайлсан лангуу, аймгуудын брэнд бүтээгдэхүүнийг сурталчилсан лангуу ажиллуулах саналыг сүлжээ дэлгүүрүүдэд тавьж байсан. “Номин” бол 21 аймаг гээд тусгай тасаг гаргаж байсан. И март жишээ нь дотоодод үйлдвэрлэсэн бараа бүтээгдэхүүний хаяг шошгыг өөр байдлаар тавьж туршиж байсан. Мөн “Woman owned” тохирлын тэмдэгтэй холбоотойгоор тэр тэмдэг бүхий лангуунууд гаргаж өгөөч гэсэн санал тавьсан.
Ер нь хэрэглэгчийн зан төлөв, бараа бүтээгдэхүүний орц найрлага, амт чанар, үзэмж гээд бүх л зүйл борлуулалтад нөлөөлж байдаг. Тэгэхээр бүтээгдэхүүн хөгжүүлэлтэндээ анхаарч, ажилах шаардлага та бүгдэд бий. Мөн хэрэглэгчийн зан төлөвт юу таалагдаж байна гэдэг судалгаагаа сайн хийх хэрэгтэй. Ер нь асуудал байгааг бид мэдэж байгаа. Дотоодын зах зээлд шаардлага хангаад, сав баглаа боодлоо стандартын шаардлагад нийцүүлвэл гадны зах зээлд гаргах тал дээр МҮХАҮТ анхаарч, үзэсгэлэн худалдаануудад авч явж байгаа” гэлээ.
Үүний дараа МҮХАҮТ-ын дэргэдэх Аялал жуулчлалын зөвлөлийн дарга Б.Барсболд “Тогтвортой аялал жуулчлал-гац шийдэл” сэдвээр, “Эс Эф Си Эс” ХХК-ийн зүгээс “Органик бүтээгдэхүүний баталгаажуулалт” сэдвээр, АТГ-ын Авлигын эсрэг соён гэгээрүүлэх хэлтсийн комиссар Н.Батчулуун "Ашиг сонирхлын зөрчлөөс урьдчилан сэргийлэх нь" сэдвээр сургалт хийв.
Тэд маргааш “АПУ” ХХК-ийн үйлдвэртэй танилцаж, туршлага судлаад, нөгөөдөр буюу энэ сарын 18-нд Сэлэнгэ аймгийн Мандал сум дахь Спирт бал бурам”-ын үйлдвэртэй танилцаад нутаг буцах юм.
