Тайванийн компани Монголын зах зээлд хэрхэн бүтээгдэхүүнээ нийлүүлэх талаар санал солилцлоо

Тайванийн “Taiwan Yes Deep Ocean Water” болон “Taiwan Fertilizer” компанийн төлөөллүүд МҮХАҮТ-ын гүйцэтгэх захирал Т.Дүүрэн болон Гадаад харилцаа хамтын ажиллагааны газрын дарга Б.Жаргалсүрэн нартай уулзлаа.

Тус компаниудын хувьд Тайванд 20 гаруй жил тогтвортой үйл ажиллагаа явуулж байгаа бөгөөд гадаад худалдаагаа өргөжүүлж, хамтран ажиллах ямар боломжууд байгааг эрэлхийлж буй аж. Улмаар бордоо болон бусад хүнсний бүтээгдэхүүн, далайн гаралтай гоо сайхны бүтээгдэхүүн үйлдвэрлэдэг, түүхий эд бэлтгэн нийлүүлдэг гэдгээ онцлон танилцууллаа.

Тус компанийн захирал Куо Чун Чен хэлэхдээ “Тайван бол далайн уур амьсгалтай улс. Тиймээс далайн түүхий эд буюу эрдэст бүтээгдэхүүнээсээ салбарлаад эрүүл мэндийн бүтээгдэхүүний түүхий эд, хими, биологийн бордооны түүхий эд, мөн түүхий эд нь далайн бүтээгдэхүүнээс бүрдсэн гоо сайхны бүтээгдэхүүн нийлүүлэх боломжтой. Ямар байдлаар Монголын зах зээлд нэвтэрч, хамтын ажиллагаа эхлүүлэх боломж байгаа вэ?” хэмээв.

Харин МҮХАҮТ-ын гүйцэтгэх захирал Т.Дүүрэн Монгол Улсад үйлдвэрлэгч аж ахуй нэгжүүд байгаа хэдий ч далайн гаралтай түүхий эд импортолж, бүтээгдэхүүн үйлдвэрлэх хэмжээнд хүртэл хөгжөөгүй байгаа гэдгийг онцлов.

Улмаар Монголд орж ирж, бизнесээ өргөжүүлэх зорилгынх нь хүрээнд МҮХАҮТ-ын зүгээс зах зээлийн судалгаагаа хийхэд нь тусламж үзүүлж, мөн МҮХАҮТ-ын гишүүн компаниудад танилцуулж, зах зээлээ нээхэд нь гүүр болох боломж бийг дуулгалаа.