ДЭЛХИЙН СТАНДАРТЫН ӨДӨР: Хиймэл оюун ухаан, инноваци, дэд бүтцийг хөгжүүлж, илүү сайхан ертөнцийг бий болгоно
Монгол Улс нь 1979 онд Олон улсын стандартчилалын байгууллагад гишүүнээр элссэнээс хойш Дэлхийн стандартын өдрийг жил бүрийн 10 дугаар сарын 14-ний өдөр тэмдэглэн өнгөрүүлдэг уламжлалтай билээ. Энэ жилийн стандартын өдрийг Тогтвортой хөгжлийн есдүгээр зорилтыг хэрэгжүүлэх чиглэлээр “ИЛҮҮ САЙХАН ДЭЛХИЙН ТӨЛӨӨ ХАМТЫН ЗОРИЛГО” уриатайгаар тэмдэглэн өнгөрүүлж байна.
Энэ өдөрт зориулж Стандарт хэмжилзүйн газраас МҮХАҮТ, Европын холбооны Свич Ази хөтөлбөрийн санхүүжилттэй “Эдийн засгийн ногоон шилжилт” СОГЭ төсөл, ЕХ-ны Монгол Улсад гадаад худалдааг хөгжүүлэх төсөлтэй хамтран илтгэл, баярын хурал зохион байгууллаа. Энэ үеэр Олон Улсын Стандартын байгууллагын Ази номхон далайн бүсийг хариуцсан зохицуулагч Стевен Лүис онлайнаар мэндчилгээ дэвшүүлэв.
“Стандарт хэмжилзүйн газрын дарга С.Батбаатар нээж үг хэлэхдээ “Дэлхийн стандартын өдрийг дэлхий даяар тэмдэглэж байна. Монгол Улсад стандарт хэмжилзүйн салбарын ажилтны өдөр тохиож байна. Засгийн газрын 2010 оны тогтоолоор Стандарт хэмжилзүйн газрын салбарын ажилтны өдөр гэж тунхаглажээ. Стандарт хэмжилзүйн газраас батлан гаргаж байгаа стандартаар бүтээгдэхүүн үйлчилгээ хүргэж байгаа бизнес эрхлэгчид, бүтээгдэхүүн үйлчилгээ хэрэглэж байгаа хэрэглэгч та бидэнд бүгдэд нь хамаатай өдөр тохиож байна.
Энэ жилт Тогтвортой хөгжлийн есдүгээр зорилттой уялдуулж зохион байгуулж байгаагаараа онцлог. Хиймэл оюун ухааны эрин үеийн үйлдвэрлэл, инноваци, дэд бүтцийг хөгжүүлж, илүү сайхан ертөнцийг бий болгох уриан дор тэмдэглэж буй юм.
Дэлхий нийтийн өмнө тавьсан тогтвортой хөгжлийг хэрэгжүүлэх ажлын хүрээнд худалдааг өргөжүүлэх, тойрог эдийн засгийг хөгжүүлэх, дэлхийн зах зээлд өрсөлдөх чадварыг нэмэгдүүлэх, төр, хувийн хэвшлийг шинэ шатанд гаргах, олон улсын нийтлэг зарчим, стандартыг нэвтрүүлэх, хүн амын амьдралын чанарыг сайжруулах, “Алсын хараа-2050” Монгол Улсын урт хугацааны хөгжлийн бодлого, Шинэ сэргэлтийн бодлого, Бүсчилсэн хөгжил зэрэг Монгол Улсыг хөгжүүлэх бодлогын бичиг баримтуудыг үр дүнд хүргэх хамгийн чухал замын зураглалын нэг хэсэг бол чанарын дэд бүтэц буюу Стандарт тохирлын үнэлгээ, хэмжилзүйн бодлогын асуудал юм.
Дэлхийн иргэд болон бизнес эрхлэгчид стандарт гэдэг ганцхан хэлээр ярьж, ойлголцож байна. Хиймэл оюун ухаанаар дэмжсэн уян хатан дэд бүтэц, тогтвортой хөгжилд хамгийн сүүлийн үеийн инновацийг хөхиүлэн дэмжсэнээр одоогийн болон ирээдүй хойч үеийн эдийн засагт эерэг өөрчлөлт авч ирэх илүү сайхан дэлхийг бид хамтдаа бүтээж чадна гэдэгт итгэлтэй байна. Цаашид хиймэл оюун ухааныг хэрэглэхтэй холбоотойгоор Олон улсын стандартын байгууллага, Олон улсын Цахилгаан техникийн хорооноос хамтран мэдээллийн технологийн салбарт батлан гаргасан 70 гаруй стандартад суурилсан үндэсний стандартыг батлан гаргах асуудал болоод байна. Та бидний хамтын ажиллагаа чухал үүрэг гүйцэтгэх тул хиймэл оюун ухааны эрин үеийн үйлдвэрлэл, инноваци, дэд бүтцийг хөгжүүлэх, илүү сайхан ертөнцийг бий болгох гэсэн уриаг санаж, хамтран ажиллахыг та бүхэнд уриалж байна” гэлээ.
Түүнчлэн МҮХАҮТ-ын дэд дарга Ц.Магнайбаатар хэлэхдээ “Бизнес, эдийн засаг, нийгмийн харилцаанд оролцогч талуудын харилцан итгэлцлийг баталгаажуулдаг төдийгүй ажил хэргийн түншлэгч талуудад нэгдсэн ойлголт өгдгөөрөө стандарт чухал ач холбогдолтой. Стандартаар баталгаажсан аливаа бизнесийн нэр хүнд, ашиг орлого өндөр байхаас гадна байнгын хэрэглэгчдээр хүрээгээ тэлж, дэлхийд гарах гарц болж өгдөг.
Бүтээгдэхүүн үйлчилгээ нь олон улсын стандартад нийцэж, тохирсон бол чанартай, аюулгүй, хэрэглээнд зохилтой гэдэг итгэлийг төрүүлдэг бөгөөд олон талаараа харилцан хамааралтай болсон өнөөгийн ертөнцөд биднийг холбох нэгдмэл нэр томъёог стандарт тодорхойлж байдаг.
Энэ жилийн хувьд Тогтвортой хөгжлийн есдүгээр зорилтын хүрээнд хиймэл оюун ухаанд суурилсан үйлдвэрлэл, инноваци болон дэд бүтцийг хөгжүүлэх зорилго агуулж байгаа нь бизнесийн орчинд цахим хөгжлийг хурдасгах, автоматжуулалтыг илүү боловсронгуйгаар үйлдвэржилтэд нэвтрүүлэх, үүгээрээ дамжуулан оюунлаг Монголыг бүтээх олон талын ач холбогдолтой гэж харж байна.
МҮХАҮТ-аас бизнес эрхлэгчдийнхээ нийтлэг эрх ашгийг хамгаалах, илэрхийлэх, бизнесийн таатай орчинг бүрдүүлэх үйл ажиллагаа, арга хэмжээг тогтмол зохион байгуулдаг. Мөн төр, хувийн хэвшлийн хүрээнд Стандарт хэмжилзүйн газартай хамтран Дэлхийн Чанарын өдрийг тэмдэглэн өнгөрүүлдэг байсан бол энэ жилээс Дэлхийн Стандартын өдрийг бас тэмдэглэж, хамтран ажиллаж байгаадаа баяртай байна. Бизнесийн салбар, чиглэл бүрт стандарт хэрэгжүүлж байгаа аж ахуй нэгжүүд болон стандарт тохирлыг баталгаажуулж буй байгууллага, энэ чиглэлээр үйл ажиллагаа явуулдаг хувийн хэвшлийн төлөөллүүддээ Дэлхийн стандартын өдрийн мэндийг хүргэе” гэв.
Хурлын эхэнд Стандарт хэмжилзүйн газрын дарга С.Батбаатар "Стандарт хэмжилзүйн газрын өнөөгийн байдал болон цаашдын чиг хандлага" сэдвээр илтгэл тавилаа. Дараа нь Цахим хөгжил, инноваци, харилцаа холбооны яамны мэдээлэл, Замын хөдөлгөөний ухаалаг зохицуулалт, Стандарт хэмжилзүйн газрын цахим үйл ажиллагааны өнөөгийн байдал сэдвүүдээр илтгэл тавих юм.
