МҮХАҮТ ӨМӨЗО-ны Улаанцав хоттой хамтарч ажиллах боломжуудыг нээлээ
Монголын үндэсний худалдаа аж үйлдвэрийн танхимын ЕНБД С.Баясгалан БНХАУ-ын ӨМӨЗО-ны Улаанцав хотын Ардын Засгийн газрын төлөөлөгч нартай уулзлаа. Уулзалтад БНХАУ-ын ӨМӨЗО-ны Улаанцав хотыг төлөөлж Ардын Засгийн Газрын орлогч дарга Ван Жэн Хай, Ардын Засгийн Газрын Гадаад харилцааны албаны дарга Ван Пин, Дөрвөд Хошууны дарга Сүлд, Ардын Засгийн Газрын Гадаад харилцаа удирдлагын хэлтсийн дарга Тиан Яатинг, Гадаад эдийн засаг, хамтын ажиллагаа, хөрөнгө оруулалт хөгжилийн ХХК-ийн захирал Гао Хун Жин нар байлцлаа.
Улмаар МҮХАҮТ-ын Гадаад харилцаа хамтын ажиллагааны газар, болон БНХАУ-ын ӨМӨЗО-ны Улаанцав хотын Ардын Засгийн Газрын гадаад харилцааны алба/Худалдааны товчоо/ хоорондын харилцан ойлголцлын санамж бичигт гарын үсэг зурав.
Тодруулбал, дараах дөрвөн чиглэлд хамтран ажиллахаар тохиролцов.
1. Хоёр талын боловсон хүчний солилцоог бүх түвшинд нэмэгдүүлж, хамтран байгуулсан платформыг ашиглан эдийн засаг, худалдааны уулзалт, семинар, үзэсгэлэнг идэвхтэй зохион байгуулж, харилцан итгэлцэл, ойлголцлыг нэмэгдүүлж, бодит хамтын ажиллагааг бэхжүүлэх
2. Хоёр талын эдийн засаг, худалдааны хамтын ажиллагааг эрчимжүүлж, хоёр орны бизнес эрхлэгчдийн харилцан холбоог нэмэгдүүлж, хоёр талын аж ахуйн нэгжүүдийн төслийн хамтын ажиллагаанд дэмжлэг үзүүлэх
3. Хоёр тал худалдаа, логистик, хилийн чанад дахь хөрөнгө оруулалт, хил дамнасан аялал жуулчлал, хамтын ажиллагаанд анхаарлаа хандуулж хөгжүүлэх
4. Хоёр талын хамтын ажиллагааны механизмыг бий болгож, шаардлагатай мэдээллийг саадгүй солилцож, хамтын анхаарал хандуулах асуудлуудаар зөвлөгөөн уулзалт тогтмол хийж, хамтын хөгжлийг нэмэгдүүлнэ.
Энэ үеэр МҮХАҮТ-ын ЕНБД С.Баясгалан хэлэхдээ “Өнгөрсөн жил Монгол Улсын Ерөнхий сайд Бээжин хотод хийсэн айлчлалын үеэр манай танхим бүрэн бүрэлдэхүүнээрээ очиж, бизнесийн орчинтой нь танилцаж ажилласан. Улаанцав хотын одоогийн хөгжлийг хараад, нэн ялангуяа цахим худалдааг нэмэгдүүлэх, чөлөөт бүсийг нэмэгдүүлэх гэх мэт хийж байгаа олон ажлуудад нь хамтарч ажиллах боломж маш их байгааг харсан. Тиймээс өнөөдрийн уулзалтаар тэдгээрийг ярилцах, цаашид хамтран ажиллах олон ажлын эхлэлийг тавих байх гэж найдаж байна” гэлээ.
Харин Улаанцав хотын Ардын Засгийн Газрын орлогч дарга Ван Жэн Хай “Улаанцав хот нь нэг бүс, нэг зам санаачлагын хүрээнд Монгол, Хятад, Оросын эдийн засгийн коридорын чухал зангилаа хот юм. Сүүлийн жилүүдэд манай хот Өвөрмонголын хөгжил цэцэглэлт, нээлттэй байдлын нүүр царай болж, газарзүйн байдлын давуу талаа ашиглаж, бүс нутгийн хамтын ажиллагааг бүх талаар өргөн хүрээнд ахиулахад хүчин чармайлт гаргаж ажилласны дүнд улсын хэмжээний хуурай замын боомтын логистикийн төв байгуулсан. Үндэсний импортын худалдааг дэмжих инновацийн жишиг бүсээр батлагдсан. Улаанцав хот нь овъёос, хүнсний ногоо зэрэг нутгийн онцлогтой бүтээгдэхүүн, үхэр, хонины мах, сүүн бүтээгдэхүүн зэрэг мал аж ахуйн гаралтай бүтээгдэхүүнийг үйлдвэрлэн нийлүүлдгээрээ БНХАУ-д овъёосны хот, төмсний хот, сүү тарагны хот гэж алдаршсан. Улаанцав хот болон Монгол Улсын хувьд газарзүйн, худалдаа, эдийн засаг, соёл боловсролын чиглэлээр хамтран ажиллах бүрэн боломжтой. МҮХАҮТ-ын та бүхэнтэй уулзаж, ирээдүйд олон салбарын хамтын ажиллагааг тасралтгүй үргэлжлүүлнэ гэж найдаж байна” гэлээ.
