Санхүүгийн дэмжлэг, хандив өргөвөл аж ахуй нэгжүүдийг татвараас хөнгөлж, чөлөөлнө

Монгол Улсын Засгийн газрын 2024-2028 оны үйл ажиллагааны хөтөлбөрт хөрөнгө оруулалт, хувийн хэвшлийг татварын бодлогоор дэмжихээр тусгасан. Аж ахуй нэгжийн орлогын албан татварын тухай хуульд нэмэлт өөрчлөлт орж, татвар төлөгч та өөрийн орлого олох үйл ажиллагаатай хамааралгүй, нийгэмд чиглэсэн хөрөнгө оруулалт хийж, санхүүгийн дэмжлэг, хандив үзүүлвэл татвар ногдох орлогын 1 хувь хүртэлх дүнгээр төлвөл зохих албан татвараас шууд хасаж, хөнгөлөхөөр болсон юм. 

Жишээ нь, таны татвар ногдох орлого 500 сая төгрөг бол таны 5 сая төгрөг хүртэл хөрөнгө оруулалт, санхүүгийн дэмжлэг, хандивыг төлвөл зохих татвараасаа хасах боломжтой.

Хэрэв та нийгмийн хариуцлагын хүрээнд:

1. Байгалийн баялгийг хамгаалах, нөөцийг нэмэгдүүлэх
2. Орчны бохирдлыг бууруулах
3. Ахмад настан, хөгжлийн бэрхшээлтэй иргэн, хүүхдийн тохируулгат орчинг бүрдүүлэх
4. Соёлын өвийг хамгаалах, сэргээх
5. Нийтийн эзэмшлийн зам, талбай барьж байгуулах
6. Гамшгийн хохирлыг барагдуулах
7. Биеийн тамир, спортыг дэмжих
8. Боловсрол, шинжлэх ухааныг дэмжих
9. Төрийн болон орон нутгийн өмчийн эрүүл мэндийн байгууллагыг дэмжих зэрэг нийгэмд чиглэсэн хөрөнгө оруулалт, төсөл хөтөлбөрүүдийг өөрийн хөрөнгөөр санаачлан хэрэгжүүлж, төрийн үүрэг ачааг хуваалцсан бол энэхүү татварын хөнгөлөлтөд хамрагдана.