Бизнес академийн компанийн засаглалын хөтөлбөрийг СЗХ-ноос сайшаалаа
Санхүүгийн Зохицуулах Хорооноос Дэлхийн багш нарын өдрийг тохиолдуулан МҮХАҮТ-ын Бизнес академийн компанийн засаглалын сургалтын хөтөлбөрүүдийн практик үр нөлөөг үнэлж, тус академийн сургалтын менежер С.Оюунсүрэнг 2024 оны 10 дугаар сарын 03-ны өдөр “Жуух бичгээр шагналаа.
Санхүүгийн Зохицуулах Хорооноос Компанийн засаглалын сургалт явуулах зөвшөөрлийг 2012 онд авсан анхны таван байгууллагын нэг МҮХАҮТ нь сүүлийн дөрвөн жилд компаниудын дээд удирдлагын хэрэгцээ, шаардлагад нийцүүлэн компанийн засаглалын сургалтын хөтөлбөрийн агуулга, төрөлжит, сургалтын арга зүйд дэвшил, хөгжүүлэлт хийж чадсан. Тус сургалтыг 300 орчим компанийн 2000 гаруй хувьцаа эзэмшигч, ТУЗ-ийн гишүүн, Гүйцэтгэх удирдлага, хуульч, хөрөнгө оруулалтын шинжээчид сонгон суралцсан байна.
МҮХАҮТ-ын Бизнес академийн “Компанийн засаглалын гэрчилгээ олгох сургалт”-аас гадна “Компанийн нэгдлийн компанийн засаглал”, “Үндэстэн дамнасан компанийн засаглал”, “Гэр бүлийн компанийн засаглал”, “Компанийг өөрчлөн байгуулах төлөвлөлт: Компанийн засаглал дахь өөрчлөлт, шилжилтийн үе”, “Компанийн засаглалын маргаан шийдвэрлэх хувилбарууд” зэрэг ялгарал бүхий хөтөлбөрүүдийг нь компанийн удирдлага, бизнес эрхлэгчдэд хамгийн өгөөжтэй хөтөлбөрүүд хэмээн Санхүүгийн Зохицуулах Хороо сайшаажээ.
МҮХАҮТ-ын Бизнес академи нь НҮБ-ын Бизнес ба хүний эрхийн удирдах зарчмуудын хэрэгжилтийг манлайлах, бизнес эрхлэх тэгш боломжийг нээх үйлсэд хувь нэмэр оруулж, тусгай хэрэгцээт иргэдэд зориулсан компанийн засаглалын сургалтыг улсын хэмжээнд анх удаа зохион байгуулсан юм.
