ҮЗЭСГЭЛЭН: БНСУ-ын бизнес эрхлэгчид хүнсний бүтээгдэхүүнээ дэлгэж, түншлэгчээ хайж байна
Монгол Улс дахь Солонгосын Худалдаа Аж Үйлдвэрлэлийн Танхимаас “Хөдөө аж ахуйн гаралтай хүнсний бүтээгдэхүүний үзэсгэлэн”-г МҮХАҮТ-ын нэг давхрын Их танхимд өнөөдөр нээлээ. 2017 оноос хойш жил бүр уламжлал болгон зохион байгуулж ирсэн энэхүү үзэсгэлэн энэ сарын 4-6-ны хооронд гурав хоног үргэлжилнэ. Тус үзэсгэлэн худалдаанд БНСУ-аас 20 гаруй компани оролцож буй бөгөөд зарим нь Монгол дахь гэрээт борлуулагчаа хайж, түншийн гэрээ хэлэлцээр хийхээр зорьж ирсэн байна.
Үзэсгэлэнгийн нээлтэд Монгол Улс дахь Солонгос улсын Худалдаа аж үйлдвэрлэлийн танхимын Ерөнхийлөгч Пак Мин Гю, МҮХАҮТ-ын гүйцэтгэх захирал Т.Дүүрэн, БНСУ-аас Монгол Улсад суугаа ЭСЯ-ны зөвлөх Кан Хён Чол, Улаанбаатар хотын Худалдааны танхимын дэд Ерөнхийлөгч Б.Хаш-Эрдэнэ нарын албаны хүмүүс оролцлоо. Мөн энэ үеэр БНСУ-ын нүүр царай болсон K POP урсгалыг сурталчилсан бүжиг, монгол соёлыг илтгэсэн урлагийн үзүүлбэрүүд болов.
Монгол Улс дахь Солонгос улсын Худалдаа аж үйлдвэрлэлийн тэнхимийн Ерөнхийлөгч Пак Мин Гю энэ үеэр “Монголчууд солонгос будаа, кимчи, чэюгбугым, булгуги, шарсан загас, догбуги зэргийг худалдан авах хандлага нэмэгдэж байгаа нь сүүлийн үед харагдаж байна. Өнөөдрөөс эхлэн гурван өдрийн турш болох Солонгос Монголын хамтарсан энэхүү үзэсгэлэнд Солонгосын шилдэг хөдөө аж ахуйн боловсруулсан бүтээгдэхүүнээ Монголын зах зээлд гаргахаар 24 аж ахуй нэгж оролцож байна.
Мөн үйл ажиллагааны үеэр B2B бизнес уулзалтууд болж, үүгээр дамжуулан Солонгос улсын ХАА-н гаралтай бүтээгдэхүүн үйлдвэрлэгч болон зуучлагч компаниудтай шууд харилцаа тогтоож, Монгол Улсын худалдан авагчдад хүргэх, зах зээлээ өргөжүүлсэн сайхан үйл ажиллагаа болно гэж итгэж байна. Мөн Солонгос, Монголын эдийн засгийн түншлэлийн гэрээ амжилттай хэрэгжиж байгаатай холбогдуулан цаашид Монгол Улсын Засгийн газар, МҮХАҮТ, Улаанбаатар хотын худалдааны танхим зэрэг байгууллагуудтай хамтран ажиллах болно” гэлээ.
БНСУ-аас Монгол Улсад суугаа ЭСЯ-ны зөвлөх Кан Хён Чол хэлэхдээ “Монгол Солонгосын хамтарсан хөдөө аж ахуйн гаралтай хүнсний бүтээгдэхүүний үзэсгэлэн яармаг болж байгаад баяртай байна. Дэлхий нийтээр хүнсний аюулгүй байдлын талаар санаа зовдог болсон. Монгол Улс ч гэсэн хөдөө аж ахуйн гаралтай хүнсний бүтээгдэхүүнийхээ талаас илүү хувийг гадаад улсаас экспортолж байна. Тиймээс хүнсний аюулгүй байдалдаа маш их анхаарч байгаа гэж ойлгож байна.
Энэ үзэсгэлэнгээр дамжуулж монголчууд солонгос хүнсний бүтээгдэхүүнийг илүү ойроос үзэж сонирхох, худалдан авах боломжтой болж, цаашлаад хоёр улсын бизнес эрхлэгчдийн хувьд идэвхтэй харилцах замаар хамтын ажиллагаагаа сайжруулах боломж бүрдэж байна” гэв.
МҮХАҮТ-ын гүйцэтгэх захирал Т.Дүүрэн мөн нээлтэд оролцож үг хэлэхдээ “Энэхүү үзэсгэлэнг жил бүр уламжлал болгон, найм дахь жилдээ зохион байгуулж байна.БНСУ-аас ирсэн зочид төлөөлөгчид Монголын сайхан оронд тавтай морилно уу. Монгол Улс БНСУ-тай 2023 оны байдлаар бараа эргэлтийн хэмжээ 426 сая ам.долларт хүрсэн ба экспорт 134 сая ам.доллар, импорт 291 сая ам.доллар байна. 2024 оны нэгдүгээр сараас есдүгээр сарын 30-ныг хүртэл БНСУ руу ноос ноолуур, тэжээвэр амьтдын хоол, самар, шар айраг, монгол гэр гэх мэт төрөл зүйлүүдээр 323 ширхэг гарал үүслийн гэрчилгээ олгосон байна. МҮХАҮТ энэ оны гуравдугаар сард БНСУ-ын Сөүл хотод зохион байгуулсан эрүүл мэндийн үзэсгэлэнд танхимын гишүүн 20 компанийг оролцуулж, хамтын ажиллагаагаа дэмжсэн. Дашрамд дурдахад БНСУ-аас Монгол Улсад суугаа ЭСЯ болон Монгол Улс дахь Солонгосын Худалдаа аж үйлдвэрийн танхимд биднийг дэмжин ажилладагт гүн талархал илэрхийлье. Цаашид Монголын экспортын бараа бүтээгдэхүүнийг БНСУ-ын зах зээлд гаргахад дэмжин ажиллахыг хүсч байна. Үзэсгэлэнд оролцогч аж ахуй нэгжүүд шинэ түншийн харилцаа нээж, гэрээ хэлцэл байгуулж, үр дүнтэй байхыг хүсье” гэв.
Та бүхэн амралтын өдрүүдэд уг үзэсгэлэнг зорин ирж худалдан авалт хийхээс гадна шинэ түншлэгч болоорой.
