Аж ахуй нэгжүүд Зөвшөөрлийн тухай хууль эрх ашгийг нь зөрчиж байгааг илэрхийлж, саналуудаа нэгтгэлээ
“Зөвшөөрлийн тухай хуулиар олгож буй тусгай болон энгийн зөвшөөрөл шинээр авах, сунгуулахад тулгарч буй асуудал, шийдэл" сэдэвт салбарчилсан уулзалт хэлэлцүүлэг энэ сарын 2,3-ны өдөр МҮХАҮТ-д амжилттай болж дууслаа. Энэхүү хэлэлцүүлэгт УИХ-ын гишүүн Х.Ганхуяг (Зөвшөөрлийн тухай хуулийн хэрэгжилттэй танилцаж, холбогдох санал, дүгнэлт гаргаж хуулийн төсөл боловсруулах ажлын хэсгийн ахлагч) ажлын хэсгийн гишүүдийн хамт оролцсон юм.
Эхний өдрийн хэлэлцүүлэгт эрчим хүч, байгаль орчин, барилга, хот байгуулалт, нийтийн аж ахуй, зам тээврийн салбарын төлөөллүүд ирж, тулгамдаж буй асуудлаа ярилцаж, саналаа хэлсэн юм. Харин өнөөдөр буюу хоёр дахь өдөр аялал жуулчлал, банк, банкнаас бусад санхүүгийн үйлчилгээ, санхүү эдийн засаг, гааль хөрөнгө оруулалт соёл, боловсролын салбарт үйл ажиллагаа явуулдаг аж ахуй нэгжүүд ирж, хууль батлагдсанаас үүдэлтэй тулгамдаж буй асуудлаар саналаа хэлж, хэлэлцүүлэгт оролцлоо. Улмаар гурав дахь хэлэлцүүлгийг орон нутгийн сонгуулийн дараа бүр өргөн хүрээнд хийхээр тохиров.
УИХ-ын гишүүн Х.Ганхуяг энэ үеэр хэлэхдээ “Зөвшөөрлийн хууль батлагдаад жил гаруй хугацаа өнгөрч байна. Хүмүүс янз бүрийн асуудал, санал гомдол ярьдаг. Тэр нь Зөвшөөрлийн хууль гэхээсээ илүү салбар хуулиудад байгаа асуудал байдаг. Хуулийн хэлэлцүүлэг болохоор манай хувийн хэвшил, компаниудын төлөөлөл идэвхгүй, саналаа бэлдэж орж ирдэггүй. Үндсэндээ Зөвшөөрлийн хуулийг батлахаас өмнө 50 гаруй хэлэлцүүлэг хийсэн байдаг. Зөвшөөрлийн хуулийн онцлог нь Зөвшөөрлийн зөвлөл гэж байгуулаад аль болох хувийн хэвшлийн хяналтад оруулах ажлыг хуулиар хийсэн. Зөвшөөрлийн зөвлөлд танхимын төлөөлөл болон бусад хувийн хэвшлийн төлөөллийг дийлэнх олонх харьцаатай оруулсан. Хуулиндаа гурван жил тутам нэг удаа аудит хийгээд, зөвшөөрлийн тухай хуульд өөрчлөлт оруулах болвол аудитын үндэслэлтэй явна гэж заасан. Зарим төрийн эрх бүхий байгууллага тэр зөвлөлийг алгасаж, УИХ-д хууль өөрчлөлт оруулах төсөл өргөн мэдүүлсэн тохиолдлууд байгаа. Яаралтай горимоор гээд ороод ирдэг. Тэгэхээр МҮХАҮТ зөвлөлд байдгийн хувьд яг энэ хуулийн хэрэгжилтийг салбар бүрээр нь өөрөө шахаад, хяналтаа хийгээд явах бүрэн боломжтой. Уг нь зөвшөөрлийн хуулийг хувийн хэвшлийн мэдэлд өгсөн анхны хууль юм. Өөрөө хяналтаа тавих боломжтой” хэмээлээ.
Харин МҮХАҮТ-ын гүйцэтгэх захирал Т.Дүүрэн “Бизнес, эдийн засагтай холбоотой хууль батлахад хэлэлцүүлгүүд хийдэг. Зарим хэлэлцүүлэг нь МҮХАҮТ-аар дамждаг. Харамсалтай нь компаниуд анхны хэлэлцүүлэгт идэвхи муутай оролцдог. Ингэхээр төрийн байгууллага өөрсдийнхөө эрх ашигт нийцсэн заалтуудаа ахиухан тусгуулчихдаг. Хууль батлагдаад хэрэгжээд ирэхээр болохгүй байгаа асуудлууд гарч ирж, хойноос нь нөхөх байдлаар асуудлаа ярьж эхэлдэг. Үүний нэг нь Зөвшөөрлийн тухай хууль. 2022 оны зургаан сард батлагдсан. 2023.01.01-нээс хэрэгжиж эхэлсэн. Хэрэгжиж эхлээд нэг жил гаруйн хугацаанд хэрэгжихэд ямар хүндрэл бэрхшээл тулгарч байгааг хэлэлцүүлгээр ярьж байна. Оройтсон ч хамаагүй өөрчлөлт оруулах нь зөв. Хуулийн хэрэгжилтийн явцыг дүгнэх ажлын хэсгийг есдүгээр сарын 05-нд УИХ-ын гишүүн Х.Ганхуягаар ахлуулж байгуулсан. Ажлын хэсгийн дүгнэлтийн хүрээнд салбаруудыг хоёр хувааж хэлэлцүүлэг өрнүүлж байна.
Аж ахуй нэгжүүд төр захиргааны байгууллагуудаас хамаарсан шалгуурууд, бүртгэлийн нугалаанууд их байна гэдэг зүйл ярьж байна. Хоёр яам ижил төстэй зөвшөөрлийг хоёр давхардуулж өгөөд байна. Давхардаж зөвшөөрөл олгож байгаа хэрнээ үнэ тариф нь тэнгэр газар шиг байна гэх мэт саналууд хэлж байна. Тэгэхээр компаниудаас гарч буй саналуудыг бүгдийг нь бичгээр давхар аваад танхим дээр жагсаалт үүсгэхээр ярьж байна. Өнөөдөр энэ хэлэлцүүлэгт ирж амжаагүй ч саналаа хэлмээр байгаа компаниуд байвал санал хүсэлтээ МҮХАҮТ руу зүйл заалтаар нь хүргүүлчих юм бол төр засагт хүргэх мэдээлэлдээ оруулах боломжтой” гэлээ.
