Ногоон хөгжилд бизнес эрхлэгчдийн оролцоог нэмэгдүүлнэ

Цаг уурын өөрчлөлтийн эсрэг 2015 оны Парисын хэлэлцээрт Монгол Улс 2017 онд нэгдэн орсон байдаг. Энэхүү хэлэлцээрт нэгдэн орсноос хойш гарсан өөрчлөлт, ахицыг дүгнэн цаашдын чиглэлээ тодорхойлох "Парисын хэлэлцээрийг хэрэгжүүлэх үндэсний зорилт, арга хэмжээ чуулган"-ы Хувийн хэвшлийн оролцоо ба Парисын хэлэлцээр сэдэвт хэлэлцүүлэг болж, МҮХАҮТ-ын дарга Т.Дүүрэн оролцлоо.

Тэрбээр чуулганы үеэр хэлсэн үгэндээ "Монголын нийт ажиллах хүчний 85 гаруй хувийг бизнес эрхлэгчид бий болгодог. Тиймдээ ч улс орны ирээдүйн ногоон хөгжлийн чиг хандлагад бизнес эрхлэгчдийн оруулах хувь нэмэр нэн чухал. МҮХАҮТ-ын зүгээс ногоон бизнесийг дэмжих чиглэлээр олон жилийн турш үйл ажиллагаа явуулж ирсэн. Эко шошго, Ногоон зээлийн батлан даалтын сан гэх мэт дурдвал цөөнгүй ажлууд бий. Нэгэнт арга барилаа олсон эдгээр ажлуудаа харин цаашид хүрээг нь тэлж олуулаа хамтран ажиллацгаая!" хэмээн уриаллаа.