Монгол, БНХАУ-тай дипломат харилцаа тогтоосны 75 жилийн ойн хүрээнд өргөн цар хүрээтэй арга хэмжээ зохион байгуулна
МҮХАҮТ-ын гүйцэтгэх захирал Т.Дүүрэн Монгол Улс дахь Хятадын Худалдааны Танхимын (БНХАУ-аас Монгол улсад хөрөнгө оруулагчдын Зунхуа нийгэмлэг) Нарийн бичгийн дарга Бо.Эрдэнийг хүлээн авч уулзлаа.
Уулзалтаар МҮХАҮТ-ын гүйцэтгэх захирал Т.Дүүрэн Хятад Улс дахь бизнесийн холбоодын зөвлөлийн нэгдсэн мэдээллийн санг Танхим дээр төвлөрүүлэх ажилд Монгол Улс дахь Хятадын Худалдааны танхимыг дэмжлэг үзүүлж ажиллахыг хүслээ. Ингэснээр Хятадын зах зээлд бараа бүтээгдэхүүнээ нийлүүлэх, хамтарч ажиллах сонирхолтой Монголын ААН-үүдэд дундын зуучлалгүй бодит үнээр худалдаа хийх нөхцөл бүрдэх юм.
Талууд Монгол Улс, БНХАУ-тай дипломат харилцаа тогтоосны 75 жилийн ойн баярын хүрээнд хоёр улсын сэргээгдэх эрчим хүч, эрүүл мэндийн аялал жуулчлал, хуулийн үйлчилгээ, хөдөө аж ахуйн чиглэлийн бизнес эрхлэгчдийн “шинэ түншлэл” үүсгэхээр болов. Улмаар арга хэмжээг 11 сарын эхээр өргөн цар хүрээнд зохион байгуулахаар тохиролцлоо.
Монгол Улс дахь Хятадын Худалдааны Танхим буюу БНХАУ-аас Монгол Улсад хөрөнгө оруулагчдын Зунхуа нийгэмлэг нь уул уурхай, барилга дэд бүтэц, ХАА, үйлчилгээ чиглэлээр үйл ажиллагаа явуулдаг нийт 145 гишүүн компанитай, БНХАУ-аас Монгол Улсад суугаа элчин сайдын яамны шууд харьяаны байгууллага юм. Гишүүн байгууллагаас дурдвал монголчуудын сайн мэдэх Хуавэй, Айрчайна, Доншинг, Петрочайна, Bank of China, ICBC гэх мэт томоохон компаниуд багтдаг.
