МОНГОЛ – ЧЕХИЙН БИЗНЕС ФОРУМЫГ ЗОХИОН БАЙГУУЛЛАА
МҮХАҮТ нь жил бүр зохион байгуулдаг Монгол – Чехийн бизнес форумыг Бүгд Найрамдах Чех Улсаас Монгол Улсад суугаа Элчин сайдын яамтай хамтран зохион байгууллаа.
Тус бизнес форумыг нээж МҮХАҮТ-ын Гүйцэтгэх захирал Т.Дүүрэн, Бүгд Найрамдах Чех Улсаас Монгол Улсад суугаа Онц бөгөөд Бүрэн эрхт Элчин сайд Эрхэмсэг ноён Ян Вытопил нар үг хэллээ. Түүнчлэн БНЧУлсын Эдийн засгийн танхимын гадаад харилцааны хэлтсийн дарга Иля Мазанек, орлогч дарга Петр Талапус нар үг хэлж, Чех улсаас хүрэлцэн ирсэн ААН-ийг танилцууллаа.
МҮХАҮТ-ын гүйцэтгэх захирал Т.Дүүрэн: “МҮХАҮТ нь уул уурхайн бус экспортыг дэмжих бодлогын хүрээнд арьс шир, ноос, ноолууран бүтээгдэхүүн, хушны самар, хөдөө аж ахуйн бүтээгдэхүүний үйлдвэрлэл, экспортыг дэмжиж ажиллаж байна. Хоёр улсын хувьд харилцан ашигтай худалдаа, бизнесийн хамтын ажиллагааг хөгжүүлэх асар их боломж бий. Энэ утгаараа БНЧУ-аас 11 компани, Монголын талаас 50 гаруй бизнес эрхлэгчид хүрэлцэн ирсэн байна” хэмээн онцолсон юм.
Бүгд Найрамдах Чех Улсаас Монгол Улсад суугаа онц бөгөөд бүрэн эрхт элчин сайд Эрхэмсэг ноён Ян Вытопил: “Монгол – Чехийн найрсаг харилцааны үр дүнд бид олон олон үр өгөөжтэй төслүүдийг амжилттай хэрэгжүүлж, Монгол улсын хөгжилд тодорхой хувь нэмрээ оруулж чадсан гэж дүгнэж байна. Мөн Чех улс нь гадаадаас ажиллах хүч татдаг орнуудын нэг бөгөөд Монголоос татаж байгаа ажиллах хүч нь автомашин, автомашины сэлбэг үйлдвэрлэлийн салбарт түлхүү ажиллаж байна. Цаашид хоёр улсын харилцаа эдийн засаг, худалдаа, хамтын ажиллагааны салбараас гадна нийгэм, соёл зэрэг бусад салбаруудад хөгжинө гэдэгт итгэлтэй байна” хэмээн онцоллоо.
Мөн тус форумд Эдийн засгийн хөгжлийн яамнаас эдийн засгийн нөхцөл байдал, хөрөнгө оруулалт худалдааны орчны талаар танилцуулга илтгэл тавьсан байна.
Форумын төгсгөлд ААН-ийн хооронд ганцаарчилсан B2B уулзалтууд зохион байгуулагдлаа.
