Компанийн нийгмийн хариуцлага, бизнесийн ёс зүйн сайн туршлага хуваалцах танилцуулга уулзалт боллоо
Япон Улсын Шизүока мужийн Худалдаа аж үйлдвэрийн танхимын удирдлагуудын МҮХАҮТ-д хийх айлчлалтай холбогдуулан Caux Round Table зөвлөлийн Япон дахь салбарын Ерөнхий нарийн бичгийн дарга ноён Хироши Ишида Бизнесийн ёс зүйн төвтэй хамтран аж ахуйн нэгж байгууллагуудын төлөөлөлд компанийн нийгмийн хариуцлага, бизнесийн ёс зүй, комплаенс сэдвийн хүрээнд баримталдаг олон улсын үзэл баримтлал, сайн туршлагын талаар илтгэл танилцуулж, хэлэлцүүлэг өрнүүллээ.
Танилцуулах уулзалтад МҮХАҮТ-ын Компанийн нийгмийн хариуцлагын зөвлөл болон Комплаенс, бизнесийн ёс зүйн зөвлөлийн гишүүн аж ахуйн нэгжийн төлөөллүүд оролцлоо.
Caux Round Table (CRT) нь тогтвортой, нийгмийн хариуцлагатай бизнесээр дамжуулан шударга, эрх чөлөөтэй, ил тод нийгмийг бүтээхээр ажилладаг бизнесийн удирдагчдын дэлхий нийтийн сүлжээ юм. 1986 онд Швейцарийн Кокс хотод байгуулагдсанаас хойш CRT-ийн гишүүд бизнесийн ёс зүй болон компанийн нийгмийн хариуцлагыг (CSR) дэмжих, хариуцлагатай бизнесийн үйл ажиллагааг хэрэгжүүлэхийн төлөө ажиллаж байна.
Caux Round Table Japan (CRT Japan) нь Японд 2006 онд ТББ (Төрийн бус байгууллага) хэлбэрээр үйл ажиллагаагаа эхлүүлсэн.
