Бизнес эрхлэх орчныг хөгжүүлэх чиглэлээр НҮБ-ын Даян Дэлхийн Гэрээ санаачлагатай хамтран ажиллах боломжийн талаар хэлэлцлээ
Монгол Улс дах Нэгдсэн Үндэсний Байгууллагын (НҮБ) Суурин зохицуулагч Ноён Тапан Мишра болон Хөгжлийн зохицуулалтын газрын хамт олон 9-р сарын 3-ны өдөр, Монголын Үндэсний Худалдаа Аж Үйлдвэрийн Танхимын (МҮХАҮТ) Ерөнхий Нарийн Бичгийн дарга С.Баясгалан, Төсөл хөтөлбөрийн газар, Бизнесийн ёс зүйн төвийн төлөөллийг хүлээн авч уулзлаа.
Энэхүү уулзалтаар Бизнесийн ёс зүйн төвийн үйл ажиллагаагаар дамжуулан Монгол Улсад аж ахуй эрхлэх таатай орчныг бүрдүүлэх, бизнесийн салбарт үйл ажиллагаа явуулж буй аж ахуй нэгжүүдийн үйл ажиллагаанд Тогтвортой хөгжлийн зорилтуудыг хэрэгжүүлэн ажиллахад чиглүүлэн зөвлөх, НҮБ-ын Даян дэлхийн гэрээний зарчмуудыг сурталчлан, түгээн дэлгэрүүлэх цаашдын үйл ажиллагааны талаар ярилцав.
НҮБ-ын Суурин зохицуулагч Тапан Мишра МҮХАҮТ болон “Рио Тинто Монгол” ХХК-ий хамтын санаачлагаар байгуулсан Бизнесийн ёс зүйн төвийн үйл ажиллагаар хариуцлагатай, тогтвортой бизнес эрхлэх хандлагыг нийгэмд төлөвшүүлэхэд хувь нэмэр оруулж, НҮБ-ын Даян дэлхийн гэрээний санаачлагыг өнгөрсөн хугацаанд дэмжин, түгээн дэлгэрүүлэх үйл ажиллагааг хэрэгжүүлсээр буйд талархаж, үргэлжлүүлэн хамтран ажиллахдаа баяртай байгаагаа илэрхийлэв.
Тогтвортой хөгжлийн зорилтуудыг хэрэгжүүлэхэд хувийн хэвшлийн аж ахуйн нэгжүүд чухал ач холбогдолтой бөгөөд НҮБ-ын Даян дэлхийн гэрээ нь бизнес эрхлэгчдэд илүү хариуцлагатай, тогтвортой үйл ажиллагаа явуулахад нь дэмжлэг үзүүлдэг болохыг онцолж, талууд цаашид НҮБ-ын Даян дэлхийн гэрээний зарчмуудыг Монгол Улсын хувийн хэвшлийн салбарын үйл ажиллагаанд нэвтрүүлж, тэдний ашигт ажиллагаанд хувь нэмэр оруулах чиглэлээр нягт хамтран ажиллах боломжийн талаар хэлэлцлээ.
Дэлхийн 160 гаруй улсад төвтэй, 14000 гаруй компани, 3800 бизнесийн бус байгууллага, 69 орон нутгийн сүлжээ бүхий НҮБ-ын Даян дэлхий гэрээ нь дэлхийн хамгийн том бизнесийн салбарын тогтвортой байдлын санаачлага юм. Уг гэрээнд одоогийн байдлаар Монгол улсаас нийт 12 жижиг дунд болон томоохон аж ахуйн нэгж байгууллагууд үүрэг амлалт хүлээн элсэн ороод байна.
