Дэлхийн эмэгтэйчүүдийн чуулга уулзалтын "Цахим эдийн засаг дахь эмэгтэйчүүдийн оролцоо" салбар хуралдааныг МҮХАҮТ амжилттай зохион байгууллаа
Монгол Улсын Ерөнхийлөгчийн ивээл дор “Дэлхийн эмэгтэйчүүдийн чуулга уулзалтын үеэр “Цахим эдийн засаг дахь эмэгтэйчүүдийн оролцоо” сэдэвчилсэн хэлэлцүүлгийг зохион байгууллаа.
УИХ-ын гишүүн, МҮХАҮТ-ын ерөнхийлөгч Д.Энхтүвшин “Монгол улсад эмэгтэйчүүд бизнесийн салбарт чухал үүрэг гүйцэтгэдэг бөгөөд 2023 оны байдлаар шилдэг 100 компанийн 24 хувь, жижиг дунд бизнесийн 60 хувь нь эмэгтэй удирдлагатай. Эмэгтэйчүүдийн цалин орлогогүй ажилд зарцуулдаг цаг хугацаа их, хөрөнгө оруулалтын эх үүсвэр хомс, санхүүгийн хүртээмж хязгаарлагдмал, ялангуяа хөдөө орон нутагт цахим болон санхүүгийн мэдлэг багатай гэсэн олон сорилтууд тэдний өмнө тулгардаг.” хэмээн нээлтийн үгэндээ онцолсон юм.
Олон Улсын Худалдааны Төвийн Гүйцэтгэх Захирал Памела Кок-Хамилтон чуулга уулзалтад оролцогчдод цахимаар мэндчилгээ дэвшүүлж, Дижитал шилжилт нь худалдаанд учирч болох биет саадыг даван туулахад тусалдаг тул Монгол Улс шиг далайд гарцгүй, хөгжиж буй орнуудын эмэгтэйчүүдийн хувьд үр өгөөж нь улам бүр нэмэгдэнэ. Түүнчлэн МҮХАҮТ-д SheTrades Монгол Hub-ыг байгуулж, 850 гаруй эмэгтэйчүүдийн бизнесийг дэмжиж, бизнесийн үйл ажиллагаагаа сайжруулах, экспортын мэдлэгээ дээшлүүлэхэд нь дэмжлэг үзүүлж, хамтран ажиллаж буй хамтын ажиллагаанд талархал илэрхийллээ.
Салбар хуралдааны үеэр Олон Улсын Худалдааны төвийн бизнес эрхлэгч эмэгтэйчүүдийг дэмжих, олон улсын худалдаанд оролцох, бүтээгдэхүүн үйлчилгээгээ экспортод гаргахад туслах, чадавхижуулах зорилготой SheTrades санаачлагын ахлах зөвлөх Танвир Ахмад илтгэл танилцуулж, Бизнес эрхлэгч эмэгтэйчүүдийн санхүүгийн хүртээмжтэй байдлын талаар хэлэлцүүлэг өрнүүлэв.
Хэлэлцүүлгийг МҮХАҮТ-ын Ерөнхий нарийн бичгийн дарга, SheTrades Mongolia Hub-ын зохицуулагч С.Баясгалан чиглүүлэн явуулсан бөгөөд SheTrades Indonesia Hub-ыг төлөөлж Тантри Соетжипо, SheTrades Philippine Hub-ыг төлөөлж Бианка Сикимте, Олон Улсын Эмэгтэйчүүдийн Худалдаа Аж Үйлдвэрийн Холбооны Ерөнхийлөгч О.Байгаль, Ханбогд Кашемир ХХК-ийн Гүйцэтгэх захирал Ч.Ганцэцэг, ТЕСО Группийн Гүйцэтгэх захирал С.Болор, Голомт Банкны Байгууллага, хөгжлийн газрын захирал Ц.Байгалмаа, Техник Импорт ХХК-ийн Гүйцэтгэх захирал Д.Ганцэцэг нар хэлэлцүүлэгт оролцож бизнесийн үйл ажиллагаа эрхлэхэд тулгардаг санхүүжилт, хөрөнгө оруулалтыг хэрхэн шийдэж буй тухай олон улсын туршлага, бүтээгдэхүүн үйлчилгээг хөгжүүлэх, нийлүүлэлтийн сүлжээг хангах, экспортод гаргах боломжийн талаар санал солилцож банкны бүтээгдэхүүн үйлчилгээг сайжруулах, зээлийн хүүг бууруулах зэрэг хэрэгцээ байгаа тал дээр санал нэгдлээ.
Салбар хуралдааны хоёр дахь хэсэгт Олон Улсын Худалдааны төвийн SheTrades санаачлагын Бодлогын чиглүүлэгч Жем Арбо “Жендэрийн мэдрэмжтэй төрийн худалдан авалт” сэдэвт илтгэл танилцуулсан бол Мэдээлэл Технологийн Үндэсний Паркийн захирал Ж.Золзаяа хиймэл оюун ухаанаар бүтээсэн Монголын анхны илтгэлийг танилцууллаа.
Хэлэлцүүлэгт олон улсын болон дотоодын судлаачид, банк санхүүгийн салбарын мэргэжилтнүүд, бизнес эрхлэгч эмэгтэйчүүд, бодлого боловсруулагчид оролцож дижитал эдийн засаг, түүний боломжууд, хэрхэн бизнесээ дижиталчлах талаар бизнес эрхлэгч эмэгтэйчүүдийг дэмжих, цаашлаад тэгш хүртээмжтэй, жендерийн мэдрэмжтэй эдийн засгийг бэхжүүлэхэд төр болон хувийн хэвшлийн оролцоог ханган ажиллах нь зүйтэй гэсэн нэгдсэн дүгнэлт дор хэлэлцүүлэг өндөрлөлөө.
