Дэлхийн бизнес эрхлэгч эмэгтэйчүүдийн төлөөлөл бие биетэйгээ танилцаж, түншлэлийн харилцаа үүсгэв
Олон улсын Худалдааны Төвийн дэргэдэх SheTrades “Mongolia Hub” бизнес эрхлэгч эмэгтэйчүүддээ зориулсан "WOMEN ENTREPRENEURS NETWORKING" хүлээн авалт амжилттай болж өндөрлөлөө. Уг үйл ажиллагаанд ОУХТ-ын SheTrades Hub-н Щвейцар дахь төв оффис, SheTrades, Ази бүс нутаг дах Вьетнам, Камбож, Филиппин, Индонези болон Монгол дах Shetrades Hub-уудын төлөөлөгч, бизнес эрхлэгч эмэгтэйчүүдийн 80 орчим төлөөлөл оролцож, бие биетэйгээ танилцаж, туршлага судалсан юм. Дээрх улсуудын төлөөлөл болсон эмэгтэйчүүд Монгол Улсын Ерөнхийлөгчийн ивээл дор зохион байгуулж буй “Ногоон ирээдүйн төлөө” сэдэвт Дэлхийн эмэгтэйчүүдийн анхдугаар чуулга уулзалтад оролцохоор Монгол Улсад хүрэлцэн ирсэн юм.
"WOMEN ENTREPRENEURS NETWORKING" хүлээн авалт, арга хэмжээний хүрээнд Азийн 5 улсын SheTrades Hub-уудын төлөөллүүд уулзаж танилцсанаас гадна хоорондоо түншлэлийн харилцаа үүсгэв. Түүнчлэн энэ үеэр МҮХАҮТ, Голомт банкны хамтарсан Women-owned тохирлын гэрчилгээ танилцуулга болж, бизнес эрхлэгч эмэгтэйчүүдийн бүтээгдэхүүн үзэсгэлэнг дэлгэсэн юм.
She Trades гэдэг бол дэлхийн маш олон улсад бий болж байгаа бизнес эрхлэгч эмэгтэйчүүдийн нэгдэл бөгөөд бүх салбарын бүх бизнес эрхлэгч эмэгтэйчүүд нэгдэх боломжтой юм.
МҮХАҮТ-ын Ерөнхий нарийн бичгийн дарга С.Баясгалан Монгол Улсад бизнес эрхлэгч эмэгтэйчүүд үйл ажиллагаа явуулахад тулгарч байгаа хамгийн гол асуудал бол эрчүүдээс 3-4 дахин илүү цагийг цалингүй ажиллаж өнгөрүүлдэг явдал гэдгийг онцоллоо. Тэрбээр “Дэлхий дахинд цалингүй ажил үйлчилгээг эдийн засагжуулаад Care economy гээд маш том ойлголт, эдийн засгийн урсгал бий болсон. Тиймээс энэ төрлийг Монголдоо хөгжүүлэх эрхзүйн орчныг бий болгох чиглэлээр Азийн сантай хамтран ажиллаж байна. Энэ нь эмэгтэйчүүдэд бизнес эрхлэх, гэрээсээ гарах боломж олгоно. Нөгөө талаасаа эмэгтэй бизнес эрхлэгчид орлого олох боломж бүрдэх юм гэлээ.
Голомт банкны хувьд сүүлийн хоёр жилийн хугацаанд бизнес эрхлэгч эмэгтэйчүүдийг чадавхижуулах хөтөлбөрийг хэрэгжүүлсэн. Мөн Канадын засгийн газар болон Азийн сантай хамтраад бизнес эрхлэгч эмэгтэйчүүдийн эдийн засгийн чадавхийг сайжруулах төсөл дээр ажиллажээ. Энэ хүрээнд Улаанбаатар болон орон нутгийн 500 гаруй бизнес эрхлэгч эмэгтэйчүүдийг энэ уулзалт сургалтуудад хамруулжээ. Тэд бизнесийн үйл ажиллагаагаа дараагийн шатанд хэрхэн гаргах вэ, бизнес моделоо хэрхэн шинэчлэх вэ, бүтээгдэхүүн үйлчилгээгээ хэрхэн шинэ дүр төрхтэйгээр харилцагчиддаа борлуулах вэ, хүний нөөцийн удирдлагаа хэрхэн удирдах вэ, үйл ажиллагаа зөв явж байна уу, бэрхшээл тулгарвал хэрхэн даван туулах вэ, хэрхэн өөрийгөө зөв удирдах вэ гэх мэт олон талт чадваруудыг дээрх эмэгтэйчүүдэд эзэмшүүлсэн талаар Голомт банкны байгууллага, хөгжлийн газрын дарга Ц.Байгалмаа илтгэлдээ дурдсан юм.
Олон улсын худалдааны төвийн She Trades Ази дахь санаачлагыг удирдах бүс нутгийг хариуцсан зохицуулагч Танвир Ахмед энэ үеэр хэлэхдээ “Олон улсын худалдааны төвийн гол зорилго нь эмэгтэй бизнес эрхлэгчдийг дэмжих зорилготой. She Trades Hub нь дэлхий даяар маш олон төвүүдтэй байдаг. Бизнесийн хөгжлийг дэмжих, эмэгтэй бизнес эрхлэгчдийг худалдан авагчидтай холбож, өгөх, үзэсгэлэн худалдаанд оролцуулах, бие биетэй нь холбох үй ажиллагаа, арга хэмжээнүүд явуулдаг. Олон улсын худалдааны төв нь олон оронтой хамтарч, She Trades санаачлагыг бодлогын болон хамтын ажиллагааны түвшинд дэмжиж, улс орнуудад төвүүдээ нээсэн. Бидний хамгийн гол зорилго бол бизнес эрхлэгч эмэгтэйчүүдэд дэмжлэг үзүүлж, тэднийг бизнесийг хөгжүүлэх зорилготой байгаа юм. Монгол байх нь маш гайхалтай байна. Монгол дахь салбар бол дэлхийн бусад салбаруудын шилдгүүдийн нэг. Зөвхөн Улаанбаатар биш хөдөө орон нутагт байгаа бизнес эрхлэгч эмэгтэйчүүдийг дэмжиж байгаад маш их баяртай байна. Хувийн хэвшлийн байгууллагуудтай хамтарч ажиллаж, Монголын бизнес эрхлэгч эмэгтэйчүүдийг дэмжих, хамтран ажиллах чиглэлээр хэлэлцээрүүд хийж байгаадаа таатай байна. Монголд зохион байгуулж буй Дэлхийн эмэгтэйчүүдийн чуулга уулзалтад оролцохдоо маш их баяртай байна” гэлээ.
