Монголын Үндэсний Худалдаа Аж Үйлдвэрийн Танхим Словени улсын Худалдаа Аж Үйлдвэрийн Танхимтай хамтран ажиллах санамж бичигт гарын үсэг зурлаа.
Монгол Улсын Ерөнхийлөгч Ухнаагийн Хүрэлсүхийн урилгаар Бүгд Найрамдах Словени Улсын Ерөнхийлөгч Др.Наташа Пирц Мусар 2024 оны 08 дугаар сарын 20-21-ний өдрүүдэд төрийн айлчлал хийж байна.
Тус айлчлалын хүрээнд МҮХАҮТ-ын Гүйцэтгэх захирал Т.Дүүрэн болон Словени улсын ХАҮТ-ын Гүйцэтгэх захирал Мариана Махерик нар хоёр улсын хамтын ажиллагааг өргөжүүлэх, бизнес уулзалт, форум зохион байгуулах, хөрөнгө оруулалт, бизнесийн төсөл хөтөлбөрүүдийг дэмжих хүрээнд хамтран ажиллах санамж бичигт гарын үсэг зурлаа.
Санамж бичгийн хүрээнд эдийн засаг, худалдаа, аж үйлдвэрийн салбарын хамтын ажиллагааг идэвхжүүлэх, гарааны бизнесүүд, жижиг дунд үйлдвэрүүдийг дэмжих, хамтарсан бизнес уулзалтууд болон арга хэмжээг зохион байгуулж хоёр орны бизнес эрхлэгчдийг холбох, шинэ түншлэл бий болгох чиглэлээр хамтран ажиллахаар тохиролцлоо.
Түүнчлэн “Монгол - Словений бизнес форум” 2024 оны 8 дугаар сарын 21-ний өдөр 09:00 цагт МҮХАҮТ-ын байранд зохион байгуулагдана. Тус бизнес форум нь хоёр улсын эдийн засаг, худалдаа, хамтын ажиллагааг ахиулах онцгой ач холбогдолтой арга хэмжээ болох юм.
Форумд Словений талаас арав гаруй компани оролцох ба Монголын бизнес эрхлэгчидтэй танилцаж, тодорхой салбарт чиглэсэн хамтын ажиллагаа, хөрөнгө оруулалтын талаар санал солилцоно.
