Монгол, Японы бизнес Форум амжилттай зохион байгуулагдлаа
Энэ жил 3 дахь удаагаа зохион байгуулагдаж буй “Монгол-Японы олон улсын бизнес, инновацын форум - 2024” 08 дугаар сарын 19-ний өдөр Улаанбаатар зочид буудлын Event hall-д болж өндөрлөлөө.
Монгол, Японы талаас 400 орчим зочин, төлөөлөгч бүртгүүлж, оролцсон тус арга хэмжээ нь Монгол-Япон хоёр улсын бизнес түншлэлийн хүрээнд зохион байгуулагддаг томоохон үйл ажиллагааны нэг юм.
Энэ жилийн форумд “Монгол Улсын эдийн засаг, аж үйлдвэржилтийн төрөлжилт” сэдвийн дор мэдээллийн технологи, хөдөө аж ахуй, нээлттэй инновац, аялал жуулчлал зэрэг салбарын төлөөллүүд илтгэл тавьж, панел хэлэлцүүлгүүд зохион байгуулагдлаа. МҮХАҮТ-ын Хэрэглэгч үйлчилгээний газрын дарга Э.Бадамхорол “Монгол Улсын экспортын боломж” сэдвээр илтгэл тавив.
Мөн форумын үеэр Улаанбаатар хот болон Японы Улсын Шинагава хот хооронд мэдээллийн технологийн чиглэлийн компаниудын хамтарсан төсөл хөтөлбөрүүдийг хэрэгжүүлэх, оюутан болон салбарын эксперт солилцоо, хоёр улсын Ай-Ти чиглэлийн компаниудын хамтын ажиллагааг дэмжих, шинжлэх ухаан, технологи, инновацын хамтын ажиллагааг хөгжүүлэх “Ай-Ти Консерциум” байгуулсан талаараа олон нийтэд зарлаж баталгаажууллаа.
