Монголын Эдийн Засгийн Форум 2024 -“Бизнесийн маргаан шийдвэрлэх шийдэл: Эвлэрүүлэн зуучлах” сэдэвт хэлэлцүүлэг боллоо
Монголын Эдийн Засгийн Форум 2024 эхлэлээ. “Go Mongolia” уриан дор хоёр өдөр үргэлжлэх энэ удаагийн Чуулганы эхний өдрийн содон салбар хуралдаануудын нэг “Бизнесийн маргаан шийдвэрлэх шийдэл: Эвлэрүүлэн зуучлах” сэдэвт хэлэлцүүлэг болов.
Арван дөрөв дэх жилдээ уламжлал болон зохион байгуулагдаж байгаа чуулган анх удаа эдийн засаг, бизнест ахиц гаргах хүчин зүйлүүдэд маргаан шийдвэрлэх соёлын гүйцэтгэх үүргийг хэлэлцлээ.
Хэлэлцүүлэгийн панелистаар УДШ-ийн шүүгч, хууль зүйн ухааны доктор Н.Баярмаа, ШЕЗ-ийн Эвлэрүүлэн Зуучлагчдын Зөвлөлийн дарга, Нийслэлийн Баянзүрх дүүргийн Иргэний хэргийн анхан шатны шүүхийн Ерөнхий шүүгч, Т.Болормаа, Монголын Хуульчдын Холбооны Эвлэрүүлэн Зуучлах Хорооны тэргүүн хуульч Д.Түмэнжаргал, Улаанбаатар худалдааны танхим, Үндэсний ба Олон Улсын Арбитрын дарга Б.Хаш-Эрдэнэ, MahoneyLiottta хуулийн нөхөрлөлийн гишүүн Д.Номин, Шихихутуг Их Сургуулийн Удирдах Зөвлөлийн Дарга Л.Мөнхдэмбэрэл нар оролцож, МҮХАҮТ-ын Бизнесийн Маргаан Эвлэрүүлэн Зуучлах Зөвлөлийн Удирдах Зөвлөлийн Дарга Б.Сэргэлэн удирдсан байна.
Хэлэлцүүлэгийг Б.Сэргэлэн санаачилж, Монголын Эдийн Засгийн Форум сайшаан дэмжиж, Хууль Зүй, Дотоод Хэргийн Яам, Шүүхийн Ерөнхий Зөвлөл, МҮХАҮТ-ын Олон Улсын Арбитр тус тус бодлогын дэмжлэг үзүүлсэн байна. Европын Холбоо (EU) болон Европын cэргээн босголт хөгжлийн банкны (EBRD) санхүүжилтээр Олон улсын эрх зүйн хөгжлийн байгууллагаас (IDLO) хэрэгжүүлж буй “Монгол Улсад арилжааны эвлэрүүлэн зуучлалыг бэхжүүлэх нь” (2023-2025) төслийн оролцоотой энэ хэлэлцүүлэг Эдийн засгийн Форум 2024 –ийн бизнес эрхлэгчдийн анхаарлыг татсан хэлэлцүүлэг болж, Монголын Хуульчдын Холбооны Эвлэрүүлэн Зуучлах Хорооны Удирдах Зөвлөл өндөр ач холбогдол өгч дэмжсэн байна.
