МҮХАҮТ-ын гүйцэтгэх захирал Т.Дүүрэн Япон Улсын Иточү корпарацийн төлөөлөгчдийг хүлээн авч уулзлаа
Япон Улсын Иточу корпарацийн Зүүн Ази бүсийг хариуцсан ерөнхий захирал Ишибаши Тадаши, Төмөрлөг, ашигт малтмал хариуцсан салбарын захирал Морита Минору нарыг төлөөлөгчдийн хамт хүлээн авч уулзлаа. Энэхүү уулзалтаар Иточу корпараци Монгол Улсын бизнесийн орчин болон хууль эрх зүйн нөхцөл байдалтай танилцаж, Монгол Улсад хийж буй бизнесээ тэлэх сонирхолтой байгаагаа илэрхийллээ.
МҮХАҮТ-ын гүйцэтгэх захирал Т.Дүүрэн “Монголын бизнесийн салбар төлөвшиж хөгжихөд Иточу корпарацийн оруулсан хувь нэмэрт гүнээ талархаж байна” хэмээгээд, “Монгол Улсад итгэл алдралгүй хамтын ажиллагаагаа өргөжүүлэх эрмэлзэлтэй байгаад баярлалаа” хэмээсэн юм.
Иточу Корпараци нь 1858 онд үүсгэн байгуулагдсан Япон Улсын худалдааны байгууллага бөгөөд эрчим хүч, газрын баялаг, машин механизм, химийн бүтээгдэхүүн, даавуу материал, хүнс, өдөр тутмын хэрэглээний бараа гэх мэт өргөн цар хүрээнд импорт, экспорт хийдэг төдийгүй мэдээллийн технологи, санхүү, хөрөнгө оруулалтын бизнес хийдэг, Япон Улсад 9, гадаад улсуудад 99 салбартай үйл ажиллагаа явуулдаг томоохон компани юм.