М-Си-Эс Кока Кола ХХК-ийн үйлдвэртэй танилцах аялал зохион байгууллаа
Бизнесээ Тогтвортой хөгжлийн бодлогуудтай уялдуулан явуулдаг М-Си-Эс Кока Кола ХХК анх 2001 онд албан ёсны франчайз эрхээ авч байжээ. Ийнхүү тасралтгүй үйл ажиллагаа явуулж, 1100 орчим үндсэн ажилтантай болж өргөжин байгаль орчинд ээлтэй үйлдвэрлэлийг хөгжүүлж байна. МҮХАҮТ-аас Монголын томоохон байгууллагуудын үйлдвэрүүдтэй танилцах аялалыг зохион байгуулдаг билээ. Энэ удаад ААН-үүдийн 40 орчим төлөөллийг М-Си-Эс Кока Кола ХХК-ийн үйлдвэртэй танилцуулахаар урьж, оролцууллаа.
Тогтвортой хөгжлийн манлайлагч байх зорилготой М-Си-Эс Кока Кола ХХК байгаль орчин, нийгэм, засаглалын чиглэлээр төслүүд хэрэгжүүлж байна. Тодруулбал, үйлдвэрийн үндсэн түүхий эд болох усны хэрэглээг хамгийн үр ашигтайгаар дахин боловсруулах, “Зөвхөн үйлдвэрийн хэрэгцээнд бус гал унтраах ангиуд, дүүргийн засаг захиргаа, ногоон байгууламжийн усалгаа зэрэгт зориулж өгч байна. Үйлдвэрээс гарч байгаа ашигласан ус байгальд ямар ч хоргүй, 99.9 % цэвэршүүлсэн ус байдаг” хэмээн тус компанийн Захиргаа, удирдлагын хэлтсийн дарга А.Хажидсүрэн ярилаа. Тэрбээр “2030 он хүртэл тавьсан зорилтондоо дахин боловсруулсан усыг 100 хувь ашиглана гэж тусгасан. Манайхаас нийлүүлж буй дахин боловсруулсан усны хэрэглээ дөнгөж 5 хувь байгаа ч нэмэгдүүлэх боломжууд бол бий. Жишээлбэл, бидний харж байгаагаар Амгалан дулааны цахилгааны станцын хөргөлтийн системд ашиглах боломжтой” гэлээ.
Уг үйлдвэр хуванцар савыг мөн дахин боловсруулж түүхий эдээ болгохоос гадна ээрмэлийн утас, хувцас, эдлэл зэрэг бусад бүтээгдэхүүний үйлдвэрлэлд нийлүүлэн ажилладаг аж. Ингэхдээ “Хуванцаргүй эх дэлхий” хөтөлбөрөө 2022 оноос эхлэн хөгжүүлж, Монгол Улсад хаягдаж байгаа бүх хуванцар савыг дахин болосвруулах хүчин чадалтай TML үйлдвэртээ нийт борлуулсан ус, ундааны хуванцар бүх саваа дахин боловсруулан бүтээгдэхүүн болгон гаргаж байгааг тус компанийн Захиргаа, удирдлагын хэлтсийн дарга А.Хажидсүрэн дурдсан.
Түүнчлэн байгальд ээлтэй хийн түлшний уурын зуухны байгууламжийг ашиглалтад оруулан эрчим хүчний шийдлийг үйл ажиллагаандаа нэвтрүүлжээ.
