МҮХАҮТ-ын дэргэдэх “КНХ ба тогтвортой хөгжил“ зөвлөлийн ээлжит уулзалт боллоо
МҮХАҮТ-ын дэргэдэх “Компанийн нийгмийн хариуцлага (КНХ) ба Тогтвортой хөгжил “ зөвлөлийн ээлжит уулзалтад зөвлөлийн идэвхтэй гишүүд болох Мобиком Корпораци, ХААН Банк, M-Си-Эс Кока Кола ХХК, Скай Хайпермаркет ХХК, ТЭСО Групп, АПУ ХК, Монос Групп, Юнител Групп, Тавантолгой ХК, RE/MAX MONGOLIA FOUNDATION, Скайтел ХХК зэрэг нийт 15 компанийн тогтвортой хөгжлийн асуудал хариуцсан захирал, менежерүүд танхимаар болон цахимаар оролцлоо. Зөвлөлд Номин Холдинг ХХК шинээр элсэн орж, уламжлалын дагуу үйл ажиллагаагаа зөвлөлийн бусад гишүүнд танилцуулав.
Уулзалтаар зөвлөлийн 2024 оны үйл ажиллагааны үндсэн чиглэлийн нэг гол асуудал болох хувийн хэвшлийн тогтвортой хөгжил, нийгмийн хариуцлагын хүрээн дэх оновчтой санаачилга, үр дүнтэй үйл ажиллагааг дэмжих, өгөөж үр дүнг нэмэгдүүлэх, шаардлагатай бодлогын болон бизнесийн орчны талаар ярилцав. Энэ хүрээнд зөвлөлийн дарга Ж. Сүнжидмаа товч танилцуулга хийж, УИХ-ын ээлжит сонгуульд оролцож байгаа намуудын мөрийн хөтөлбөрүүд дэх Тогтвортой хөгжил болон бизнесийн байгууллагуудын нийгэм, байгаль орчин, тогтвортой хөгжлийн үйл ажиллагаатай уялдах, анхаарах зүйлсийн талаар ярилцав.
Мөн зөвлөлийн гишүүн компаниудын чадавхыг дэмжих хүрээнд МҮХАҮТ-ын дэргэдэх Бизнес Академийн захирал Д.Асралт “Бизнесийн манлайлагчдад болон Тогтвортой хөгжил" сэдвийн хүрээнд явуулах сургалт хөтөлбөрийн талаар мэдээлж, зөвлөлийн гишүүдийн хэрэгцээ, шаардлагын талаар хэлэлцлээ. “Сүүлийн жилүүдэд зөвлөлийн гишүүн компаниуд үйл ажиллагаа, бизнесийнхээ хүрээнд тогтвортой хөгжлийн үзэл баримтлалыг мөрдлөг болгон ажиллахад ихээхэн дэвшил гаргаж байгаа бөгөөд томоохон гишүүн компаниуд тогтвортой хөгжлийн болон Байгаль орчин- Нийгэм – Засаглалын (БОНЗ) тайланг тогтмол гаргаж эхэлж байгаа нь сайшаалтай” гэж зөвлөлийн дарга Ж. Сүнжидмаа уулзалтын төгсгөлд онцлон тэмдэглэв.
МҮХАҮТ-ын дэргэдэх “КНХ ба Тогтвортой хөгжил “ зөвлөлд Монголын эдийн засгийн гол гол салбарт бизнес эрхлэн явуулдаг аж ахуйн нэгжүүд гишүүнээр нэгдэн орсон. Гишүүн компаниуд тогтвортой хөгжлийн үзэл баримтлал дээр суурилсан бүтээлч бөгөөд хариуцлагатай бизнесийг улс орон, орон нутгийн түвшинд хөгжүүлж, түгээн дэлгэрүүлэхэд хамтран хүчин чармайлт гарган ажилладаг.
