Ц.Магнайбаатар: Монгол-Кубын харилцааг эдийн засаг, худалдааны харилцаагаар баяжуулан өргөжүүлэх нь бидний үүрэг
Бүгд Найрамдах Куба улсаас Монгол Улсад суугаа Онц бөгөөд Бүрэн Эрхт Элчин сайд ноён Хорхе Альберто Феррер Родригес, Элчин сайдын яамны нарийн бичгийн дарга О.Мандуул болон ГХЯ-ны Гадаад Худалдаа, Эдийн Засгийн Хамтын Ажиллагааны Газрын зөвлөх Д.Эрдэнэ-Очир нар МҮХАҮТ-д хүрэлцэн ирж хоёр улсын хооронд бизнес, худалдаа, хөрөнгө оруулалтын боломжуудын талаар танилцуулга хийлээ. Энэхүү арга хэмжээт уулзалтыг хамтран зохион байгуулсан Элчин сайд эрхэмсэг ноён Хорхе Феррер Родригес МҮХАҮТ-ын Дэд захирал Ц.Магнайбаатар талархал илэрхийлээд “Манай хоёр улс улс төрийн хувьд уламжлалт найрсаг харилцаатай. Энэхүү харилцааг эдийн засаг, худалдааны харилцаагаар баяжуулан өргөжүүлэх нь бидний үүрэг гэж үзэж байна. Энэхүү арга хэмжээ үр дүнтэй болж хоёр талын харилцан ашигтай хамтын ажиллагаа эхлүүлэхэд түлхэц болно” гэсэн юм.
Уг танилцуулах арга хэмжээнд Монгол Улсын хүнс, хөдөө аж ахуй, эм-био технологи, уул уурхайн 25 гаруй компаниуд оролцсон бөгөөд Куба Улсын элчин сайд Хорхе Феррер аж ахуй нэгжийн төлөөллүүдтэй биечлэн уулзаж, хамтын ажиллагаа, боломжуудын талаар санал солилцсон. Түүнчлэн Куба дипломатч Кубын экспортын бүтээгдэхүүнүүд, Мариелийн хөгжлийн онцгой бүс (ZEDM) болон хөдөө аж ахуй, мал аж ахуй, хүнс үйлдвэрлэл, уул уурхай, биотехнологийн салбарт хөрөнгө оруулах боломжуудын багцыг танилцуулав.
Мөн тэрбээр хоёр улс хөдөө аж ахуй, мал аж ахуй, хүнс үйлдвэрлэл, Кубын биотехнологи, хүн, амьтны эрүүл мэнд болон органик, байгаль орчинг бохирдуулдаггүй хөдөө аж ахуйн салбарт харилцан биенээ нөхөн хамтран ажиллах боломж байгааг онцоллоо.
