БНХАУ-ын Бээжин хотноо “Замын-Үүд, Эрээний эдийн засгийн хамтын ажиллагааны бүс”-ийн хөрөнгө оруулалтын чуулга уулзалт боллоо
Замын-Үүд чөлөөт бүсийн Захирагчийн ажлын алба, БНХАУ-ын ӨМӨЗО-ны Эрээн хотын Ардын Засгийн газартай хамтран Монгол, Хятадын Замын-Үүд, Эрээний эдийн засгийн хамтын ажиллагааны бүсийн хамтарсан хөрөнгө оруулалтын чуулга уулзалтыг 2024 оны 5 дугаар сарын 31-ний өдөр БНХАУ-ын Бээжин хотод амжилттай зохион байгууллаа. Уг чуулга уулзалтад МҮХАҮТ-ыг төлөөлөн дэд захирал Ц.Магнайбаатар, МҮХАҮТ-ын дэргэдэх Чөлөөт бүсийн хөрөнгө оруулагчдын нэгдсэн зөвлөлийн дарга, Барс группийн ерөнхий захирал Ч.Амарбаатар, Хэрэглэгч үйлчилгээний газрын дарга Э.Бадамхорол, Бодлого, стратегийн газрын ахлах мэргэжилтэн Б.Батцэцэг нар оролцлоо.
Чуулганы үеэр Замын-Үүд чөлөөт бүсийн Захирагч Ц.Ганбат болон БНХАУ-ын талаас ӨМӨЗО-ны Эрээн хотын Эрээн хотын орлогч дарга Шиао Жианжүн нар “Эдийн засгийн хамтын ажиллагааны бүс”-ийн өнөөгийн нөхцөл байдал, цаашид хийгдэх ажлын талаар дэлгэрэнгүй танилцуулж хоёр орны бизнес эрхлэгчдийг уг чөлөөт бүсэд хөрөнгө оруулалт хийж харилцан ашигтай хамтран ажиллахыг уриалав.
Замын-Үүд, Эрээний эдийн засгийн хамтын ажиллагааны бүсийн талаар товч дурдвал хамтын ажиллагааны бүс байгуулах тухай Монгол Улсын Засгийн газар, БНХАУ-ын Засгийн газрын хоорондын хэлэлцээрийг 2021 оны 12-р сард Монгол Улсын Их Хурал соёрхон баталж 2022 оны 1-р сард хүчин төгөлдөр мөрдөж эхэлсэн бол Хятадын төрийн зөвлөлөөс 2024 оны 3-р сарын 19-ний өдөр хамтын ажиллагааны бүс байгуулахыг албан ёсоор баталсан байна. Уг бүс Монгол Улсын 900 га, БНХАУ-ын 903 га газар нутгийг хамарч байгаа бөгөөд хоёр бүсийг холбосон авто зам, төмөр зам барих ажил төлөвлөх шатандаа явж байна. Эдийн засгийн бүсээр дамжуулан олон улсын бараа бүтээгдэхүүний экспорт, импорт, хил дамнасан аялал жуулчлал, олон улсын эмнэлэг, шинэ эмийн судалгаа хийх лаборатори байгуулах гэх мэт олон бүтээн байгуулалт хийхээр төлөвлөгдөөд байна.
