Олон улсын худалдааны төв болон МҮХАҮТ-ын хамтын ажиллагааны уулзалт
ДХБ-ын Олон Улсын Худалдааны Төв (ITC)-ийн Ази, Номхон далайн бүсийг хариуцсан дарга Силви Бетемпс Кочин, SheTrades Hubs Глобал зохицуулагч Мишель Кристи, Ази бүс нутгийн зохицуулагч Танвир Ахмад болон Экспортын стратеги хариуцсан ахлах мэргэжилтэн Оливье Марти нар МҮХАҮТ-ын Ерөнхийлөгч Д.Энхтүвшин, SheTrades Hub Mongolia-ийн төлөөлөгч Б.Мичидмаа нарыг хүлээн авч уулзан Монгол Улсын Ерөнхийлөгчийн ивээл дор 08 сард зохион байгуулах Дэлхийн эмэгтэйчүүдийн чуулга уулзалтын хүрээнд "SHE'S NEXT – Women Empowerment" арга хэмжээг хамтран зохион байгуулах талаар ярилцлаа. Хатагтай Силви Бетемпс Кочин уг арга хэмжээг дэмжиж байгаагаа илэрхийлж, бүс нутгийн хэмжээнд эмэгтэйчүүдийн эдийн засгийн оролцоонд чухал нөлөө үзүүлэх боломжтойг онцлон тэмдэглэв. Мөн МҮХАҮТ-ын зүгээс SheTrades Mongolia Hub-ын санаачилга, ажлын туршлагыг танилцуулсан.
Түүнчлэн Монгол Улсын уул уурхайн бус экспортын үндэсний стратегийг хэрэгжүүлэх, аж ахуйн нэгжүүдийн экспортын бүтээгдэхүүний өрсөлдөх чадварыг нэмэгдүүлэх, хүний нөөцийг сургаж, чадавхжуулах, худалдаа, хөрөнгө оруулалтын хууль эрх зүйн орчныг сайжруулах талаар санал солилцож, ITC-тай хамтран ажиллахаар болсон төдийгүй Монгол Улсын хоёр хөршөөр дамжин өнгөрөх барааны тээвэр, ложистикийн хүндрэл, сорилтуудын талаар танилцуулж, дамжин өнгөрөх барааны тарифийн болон тарифийн бус саад тотгорыг багасгах тал дээр арга зүйн дэмжлэг үзүүлэхийг хүслээ.
