НҮБ-ын Хүний эрхийн дээд комиссар болон МҮХАҮТ хоорондын хамтын ажиллагааны уулзалт
2024 оны 6-р сарын 4-ний өдөр Швейцарь улсын Женев хотноо НҮБ-ын Хүний эрхийн дээд комиссарын төв албаны Ази-Номхон далай, Ойрх Дорнод, Хойд Африкийн салбарын тэргүүн Франческо Мотта Монголын Үндэсний Худалдаа Аж Үйлдвэрийн Танхимын Ерөнхийлөгч Д.Энхтүвшинг хүлээн авч уулзлаа.
Уг уулзалтаар Монгол Улс дахь бизнес ба хүний эрхийн нөхцөл байдлын талаар ярилцаж, Хүний эрхийн дээд комиссартай хамтын ажиллагааг өргөжүүлэх талаар санал солилцсон бөгөөд Монгол Улс дахь бизнесийн шударга байдал, хүний эрхийг сайжруулахад зорьсон хамтарсан сургалт, судалгаа, төсөл хөтөлбөр болон төв Ази, зүүн Европын улсуудтай туршлага солилцох зэрэг хамтын ажиллагааны боломжит чиглэлүүдийг онцоллоо.
МҮХАҮТ-ын эрхэм зорилго нь Монгол дахь бизнес эрхлэгчдийг дотооддоо болон олон улсад төлөөлөн бизнесийн таатай орчныг бүрдүүлэх, бизнесийн хөгжлийг түүчээлэх, олон улсын худалдаа, хөрөнгө оруулалтыг дэмжих явдал юм. МҮХАҮТ өнгөрсөн жилүүдэд бизнесийн шударга байдал, хүний эрхийн талаарх мэдлэгийг дээшлүүлэх олон санаачилгыг манлайлж, Монгол Улсад бизнесийн орчны тэгш байдлыг хангахад чиглэсэн урт хугацааны бизнесийн ёс зүй, шударга байдлыг бий болгоход дэмжлэг үзүүлэх зорилготой Бизнесийн ёс зүйн төвийг байгуулж “Бизнесийн шударга байдлыг бэхжүүлэх нь” төслийг амжилттай хэрэгжүүллээ.
Энэхүү төслийн хүрээнд Монголын бизнес эрхлэгч, төр, хувийн хэвшлийн аж ахуйн нэгжүүдэд зориулсан бизнесийн ёс зүй, комплаенсын чиглэлээр сургалт, зөвлөх үйлчилгээ, цахим номын, гарын авлага боловсруулах мөн олон нийтийн мэдлэг ойлголтыг нэмэгдүүлэх чиглэлээр Бизнесийн ёс зүй, комплаенсын үндэсний I,II форумыг зохион байгуулсан.
